Силәбелә күренекле башҡорт балеринаһы тураһында китап донъя күрҙе

 Рәсәйҙә тәүге тапҡыр башҡорт балетының тере легендаһы: балерина, балетмейстер, педагог, Башҡортостан Республикаһының атҡаҙанған артисы, Салауат Юлаев ордены кавалеры Эмма Тимерғәзина хаҡында китап сыҡты. Баҫма Силәбелә «Абрис» нәшриәтендә донъя күрҙе.

Уның авторы – Силәбе яҙыусыһы, режиссер һәм билдәле йәмәғәт эшмәкәре Мөнирә Хәлимова. Китапта танылған балеринаның тормошо һәм ижады, уның дуҫтары, коллегалары, бала сағы, уның биографияһының башҡа мөһим мәлдәре хаҡында йәнле һәм мауыҡтырғыс итеп бәйән ителә. Баҫмала балеринаның шәхси архивынан уникаль фотолар урын алған, уларҙың күбеһе тәүге тапҡыр баҫылған: Мөнирә Хәлимова күренекле балеринаның Ленинград хореография училищеһындағы сығарылыш концертында тәүге сығышынан алып үҙенсәлекле фотойылъяҙмаһын төҙөгән. Китап фактологик материалдарға бай.

Төҫлө фотоһүрәттәр һәм текст XX быуаттың бөйөк балеринаһының ҡыҙыҡлы портретын тыуҙыра. Китап авторҙың үҙ аҡсаһына нәшер ителә. Хәҙер Мөнирә Үлмәҫ ҡыҙы Бөйөк Ватан һуғышында ҡатнашҡан атаһы тураһында яңы китап яҙа, тип хәбәр итте башҡорт халыҡ үҙәгенең матбуғат секретары Михаил Хәбиров.

https://www.bashinform.ru/news/culture/2025-03-20/v-chelyabinske-vyshla-kniga-o-legendarnoy-bashkirskoy-balerine-4164241