Республикабыҙҙа Ғәди Арыҫлановтың 100 йыллығына журналистар конкурсы башланды

Башҡортостанда журналистарҙан «Бөйөк Еңеүҙең 80 йыллығына» Ғәди Арыҫланов исемендәге премияға эштәр ҡабул ителә башланы. Конкурс Рәсәйҙең билдәле журналисы, «Стәрлетамаҡ эшсеһе» ҡала гәзитенең элекке баш мөхәррире, Бөйөк Ватан һуғышында ҡатнашҡан, Курск дуғаһынан алып Берлинғаса барып еткән яҡташыбыҙҙың тыуыуына 100 йыл тулыуға бағышлана.

«Беҙҙең конкурс 9 майҙа илебеҙ 80-се тапҡыр билдәләгән Ватан геройҙарының еңеүенә арнала, — тип хәбәр иттеләр республиканың Яҙыусылар союзынан. — Шәп мөхәррир һәм журналист, фронт яҙмалары авторы Ғәди Арыҫланов иҫтәлегенә һәләтле ойоштороусы, автор һәм Стәрлетамаҡ ҡалаһы гражданы исемендәге премия булдырҙыҡ».

Конкурс Башҡортостандың Журналистар союзы һәм Ғәди Мөхәмәт улының ғаиләһе булышлығында ойошторола. Арыҫланов исемендәге премияға Рәсәйҙең киң мәғлүмәт саралары — федераль һәм төбәк гәзиттәре, телерадиокомпаниялар, ижади берекмәләр, мәғлүмәт агентлыҡтары, редакциялар, нәшриәттәр вәкилдәре, яҙыусылар, блогерҙар, гәзит-журналдарҙың штаттан тыш һәм штаттағы авторҙары, студенттар, музейҙарҙың һәм башҡа ойошмаларҙың матбуғат хеҙмәте вәкилдәре дәғүә итергә мөмкин.

Еңеүселәр түбәндәге номинацияларҙа билдәләнә:

Бөйөк Ватан һуғышында ҡатнашыусы менән иң яҡшы интервью,
Мемуаристика жанрындағы иң яҡшы материал,
Илде һаҡлаусы геройҙар, Бөйөк Ватан һуғышында ҡатнашыусылар тураһында иң яҡшы фото- йәки видеоматериал,
Хәҙерге заманда Тыуған илде һаҡлауҙың көнүҙәк темаларына иң яҡшы материал,
Иң яҡшы публицистик материал.

Фронтовик журналистың ҡыҙы – Рәсәйҙең Журналистар союзы ағзаһы Әлфирә Арыҫланова әлеге ваҡытта Мәскәүҙә йәшәй. Ул конкурста ҡатнашыусыларға үҙенең теләктәрен еткерҙе.

«Бөйөк Еңеүҙең 80 йыллығы –  донъя, ил, республика, ҡала, һәр кемдең байрамы. Ошо көн яҡынайған һайын, беҙ йәнә аяҡ күк йөҙө булһын тип теләйбеҙ. Хәҡиҡәтте эҙләп атайҙарыбыҙға мөрәжәғәт итәбеҙ, уларҙан ҡыйыулыҡ, аҡыллылыҡҡа өйрәнәбеҙ, терәк эҙләйбеҙ. Шуға күрә фекер тәрәнлеге, ихласлыҡ, профессиональ сифат материалдарҙы һайлап алғанда төп талап булып тора», — тип билдәләне Әлфирә Арыҫланова.

Материалдар премияны ойоштороу комитетының электрон почтаһына 2025 йылдың 9 майына тиклем ебәрергә кәрәк: [email protected] (Башҡортостандың Журналистар союзы) һәм [email protected].Һөҙөмтәләр 2025 йылдың 10 июненә тиклем билдәле була. Еңеүселәрҙе бүләкләү тантанаһы Республика матбуғаты көнөндә – 2025 йылдың 14 июнендә үткәрелә. Конкурстың шарттары тураһында тулыраҡ мәғлүмәт – беркетелгән файлда.

https://www.bashinform.ru/news/culture/2025-02-04/v-bashkirii-ob-yavlen-zhurnalistskiy-konkurs-k-100-letiyu-gadiya-arslanova-4107635