Өфөлә Роберт Юлдашев беренсе «Ел музыкаһы» фестивален ойоштора

7-9 февралдә Өфөлә беренсе «Ел музыкаһы» музыка һәм бейеү фестивале үткәрелә. Башҡортостандың халыҡ артисы, Ш.Бабич исемендәге дәүләт йәштәр премияһы лауреаты, Салауат Юлаев ордены кавалеры, бик күп халыҡ-ара конкурстар лауреаты Роберт Юлдашев яңы программаһы менән таныштыра. Бөгөн «Рәсәй» матбуғат үҙәгендә фестивалде ойоштороусылар ошо хаҡта ентекле мәғлүмәт менән уртаҡлашты.

— Ҡурайһыҙ байрам – аҡсаны елгә осороу ул. Концертта халыҡ уйын ҡоралдары яңғыраһа, үҙенсәлекле байрам килеп сыға, — тип белдерҙе Роберт Юлдашев. — Фестиваль күҙҙәрен йомоп, музыканттар менән бергә гүзәллек донъяһына сума алырҙай йыр-моң һөйөүселәргә оҡшар.

Өс көн дауамында Роберт Юлдашевтың һәм «Ҡурайсы» этно-төркөмөнөң концерты (7 февраль), дәртле бейеү һәм музыка фестивале (8 февраль) һәм саҡырылған сәхнә йондоҙҙары менән этно-музыка фестивале (9 февраль) була. «Башҡортостан» дәүләт концерт залында күрһәтмә сығыштар ғына көтөлә.

— Беҙ таланттар эҙләйбеҙ, ғаризаларҙы йәшкә ҡарамайынса ҡабул иттек. Башлыса Башҡортостандың төрлө райондарынан ҡатнашалар. Был аҙнала беҙ һайлап алыуҙы тамамлайбыҙ, — тине фестивалде ойоштороусы, концерт директоры Регина Агилова. —  Фестивалдең бер үҙенсәлеге — бейеүселәр йәнле музыка аҫтында сығыш яһарға тейеш.

Милли халыҡ уйын ҡоралдары оркестры проекты менән ауаздаш исемгә килгәндә, Роберт Юлдашев былай тине:

— «Ел музыкаһы» тигән исем – Хоҙай бүләге. 2013 йылда Рәсәй буйлап гастролдәрҙә йөрөгәндә, бер ҡалала тамашасылар ҡурайҙы, беҙҙең легендаларҙы тыңлағас, концерттан һуң яныбыҙға килде. «Был – ел музыкаһы! Күңелебеҙгә үтеп инде», тине улар һоҡланып. Уларҙың һүҙҙәренән тәнем семерҙәп китте, һәм беҙ программаны шулай тип атарға булдыҡ, — тип һөйләне Роберт Юлдашев. — Беҙҙең эшмәкәрлектә остазлыҡ бар. Беҙгә филармониянан йәш һәләтле музыканттар килеп, тәжрибә үҙләштерҙе, беҙҙең менән практика үтте. Шул рәүешле уларҙың «Ел тыуҙырған моң...» тигән программаһы барлыҡҡа килде.

https://www.bashinform.ru/news/culture/2025-01-29/v-ufe-robert-yuldashev-organizuet-pervyy-festival-muzyki-i-tantsa-muzyka-vetra-4101274