Башҡортостан “Юлдаш” телеканалы аша Башҡортостан Хөкүмәтенең Премьер-министры урынбаҫары, ауыл хужалығы министры Эрнст Исаев 23 апрелдә республика халҡының һорауҙарына яуап бирҙе. Әйткәндәй, “Асыҡ республика” проектына ярашлы, айҙың һәр дүртенсе дүшәмбеһендә Премьер-министр урынбаҫарҙары эфир аша халыҡ менән аралашып торасаҡ.
Әлбиттә, крәҫтиәнде иң борсоғаны — ауыл хужалығының бөгөнгө хәле. Яғыулыҡ-майлау материалдары, ашлама хаҡтары ла ҡыҙыҡһындырмай ҡалмай.
— Минераль ашламаларҙың хаҡын арзанайтыу өсөн субсидия бирә башлайбыҙ. Былтырғыға ҡарағанда, быйылғы миҙгелдә аграрийҙарға ярҙам ике тапҡырға күберәк буласаҡ. Мәҫәлән, яғыулыҡ 13 һумға ғына төшәсәк, был — заправкалау станцияларына ҡарағанда ике тапҡырға арзан.
Синоптиктар фаразлауынса, быйыл да йәй ҡоро килмәксе. Ләкин сәсеүҙең иртә башланып, иген һәм ҡуҙаҡлы культураларҙың 10 майға, ә техник культураларҙың 20-һенә тиклем сәселеп бөтөргә тейешлеге тынысландыра. Министр ҙа, быйыл ҡоролоҡ көтмәйбеҙ, тип дәртләндереп ебәрҙе, ауыл эшсәндәрен ең һыҙғанып эшләргә саҡырҙы. Ысынлап та, быйылғы кеүек йылда яҙҙың бер көнө йылды туйҙырасаҡ.