Ниһайәт, Рәсәйгә ҡарата ҡабул ител­гән санкциялар ил етәкселеген һиҫкән­дереп ебәрҙе, сөнки халҡын ризыҡ менән тәьмин иткән, туйындыра алған дәүләт кенә үҙен көслө хужамын тип иҫәпләй ала. Санкциялар йәшелсәселекте үҫте­реүгә этәргес, үҙебеҙҙең етеш­тереү­се­ләргә аҙығын һатырға, файҙа күрергә, артабан ошо йүнәлештә сәм­ләнеп эш­ләргә дәрт бирәсәк, тип бил­дәләй бел­гестәр.
Тәү ҡарауға барыһы ла анһат һымаҡ, сөнки йәшелсә үҫтереү өсөн оҙайлы ваҡыт талап ителмәй – бер йәйҙә байтаҡ уңыш алырға була. Әммә уны йыл әйлә­нәһенә яҡшы итеп һаҡларға, кәштәләргә матур, сифатлы килеш сығарырға ла кәрәк бит әле. Ә илдә уларҙы һаҡлау биналары етешмәй, булғандары ла заман талаптарына яуап бирерлек түгел. Ошо тәңгәлдә шаҡтай проблеманы хәл итәһе бар. Рәсәйҙең Иҡтисади үҫеш министр­лығы белгестәре 2015 йылдың ҡыш – яҙ ай­ҙарында йәшелсәгә хаҡтың кинәт ар­та­сағын нәҡ ошо мәсьәләләргә бәй­ле аңлата.
Йәнә тармаҡта технологик үҫеш, эш алымдарын яҡшыртыу талап ителә. Бик оҙаҡ һаҡлап булмай торған йәшелсә төр­ҙәре лә бар бит әле, мәҫәлән, помидор, ҡыяр… Уларҙы халыҡҡа етерлек күләм­дә тәү сиратта теплицалар төҙөү иҫәбенә арттырыу көтөлә. Былтыр Рәсәйҙең ауыл хужалығы предприятиеларында 1 880 гек­тарҙан ашыу майҙанда теплица булһа, импортты бөтөнләй онотоу өсөн йәнә 26 мең гектар ерҙә заманса биналар төҙөргә кәрәк.
Белгестәр 2017 йылда, былтырғы ме­нән сағыштырғанда, йәшелсә – дүрт, ә бәрәңге үҫтереү алты – һигеҙ процентҡа артасаҡ, тип билдәләй.
Рәсәйҙең Ауыл хужалығы ми­нистр­лығы 2015 – 2020 йылдар арауығында 1,5 мең гектар майҙанда теплица төҙө­ләсәк тип фараз итә, йәшелсә үҫтереүгә ве­домство өҫтәмә рә­үештә 41,3 миллиард, шул иҫәптән 2015 йылға 6 миллиард һум аҡса бүлеүҙе һорай.
Рәсәй донъяла уң­ды­рышлы тупрағы ме­нән дан тота. Үкенескә ҡаршы, һуңғы осорҙа беҙҙе туйындырған ер хужаһыҙға әүе­рел­де. Мәҫәлән, аҙаҡҡы 15 йылда сә­сеү­лек­тәр майҙаны 15 миллион гек­тарға кә­ме­не. Ә тиҫтә йыл самаһы таш­ландыҡ хәлдә ятҡан һөрөнтө ерҙең артабан ауыл хужалығы эшмә­кәр­леге өсөн яраҡһыҙ бу­лыры һәр кемгә мәғлүм. Эшкәртелеп, уңыш биреп, халҡын туй­ҙырғанда ғына ерҙе бай­лыҡ сығанағы тип атарға мөм­кин. Ә бит Рәсәйҙәге сәсеү­лектәр майҙаны үҙебеҙ­ҙе генә түгел, ярты донъяны туйҙырырға етә.
Әле беҙгә сит илдәр үҙҙәре үк уңайлы форсат бирҙе. Бары ошо мөмкинлекте һөҙөмтәле итеп файҙаланырға, ең һыҙ­ғанып эшкә тотонорға кәрәк.