Республиканың иҡтисади хәле, нигеҙҙә, нефть сығарыу, нефть эшкәртеү, тау сәнәғәте тармаҡтары менән билдәләнә. Башҡортостан нефть сығарыу буйынса Төмән өлкәһенән һәм Татарстандан ҡала — өсөнсө, ә эшкәртеү буйынса беренсе урында бара. Уралдың баҡыр, цинк сәнәғәтендә беҙҙең предприятиелар биргән концентраттар шаҡтай ҙур өлөштө тәшкил итә. Алтын, тимер, баҡыр-колчедан мәғдәне, көрән күмер табыу әүҙем бара. Файҙалы ҡаҙылма байлыҡ сығарыу – республика хужалығында көнүҙәк мәсьәләләрҙең береһе. Был бигерәк тә төҫлө металлургияға ҡағыла, сөнки ул, ҡайһы бер башҡа тармаҡтар (машина эшләү, оборона сәнәғәте) кеүек үк, уҙған быуаттың 90-сы йылдарында ауыр хәлдә тороп ҡалды.
Республика биләмәһендә төрлө файҙалы ҡаҙылмаларҙың 3 меңдән артыҡ ятҡылығы иҫәптә тора. Улар араһында 200-ҙән күберәк нефть һәм газ-конденсаты, 10-ға яҡын көрән күмер, 14 баҡыр-колчедан мәғдәне, 20-ләгән тимер мәғдәне, бер нисә боксит ятҡылығы, һибелмә алтындың бик күп ваҡ ятыштары бар.
Һуңғы йылдарҙа геологтар Белорет районында ифрат ҡыҙыҡлы ике ятҡылыҡ асып ҡыуандырҙы. Уларҙың береһе – плавик шпатының (минералогия фәнендә – флюорит) Суран ятҡылығы. Был – оптика, атом, электр менән иретеп йәбештереү (электрод яһау өсөн), алюминий (криолитлы) һәм металлургия сәнәғәте өсөн бик дефицит һаналған минераль сеймал. Һүҙ ыңғайында шуны ла билдәләргә кәрәк: был сеймалды Уралда ла, элекке Союздың Европа өлөшөндә лә тапманылар, Ҡытайҙан, Монголиянан һәм Көнсығыш Себерҙән алдылар. Тимәк, Суран флюорит ятҡылығы — Башҡортостан геологтарының ҙур ҡаҙанышы. Икенсеһе – Исмаҡай магнезит ятышы. Уның запасы бик күп булһа ла, үкенескә ҡаршы, мәғдәне бигүк сифатлы түгел. Ә бына унда юғары сифатлы магнезит алыу өсөн байыҡтырыу фабрикаһын төҙөү мөһим.