Күмәкләшеп ҡурсаҡ уйнаныҡ12.02.2019
Ҡурсаҡ иң боронғо уйынсыҡтарҙан һанала. Өлкәндәр был тәтәйгә ҙур иғтибар биргән, сөнки ул – ниндәйҙер кимәлдә баланың дуҫы, иптәше. Сабый ҡурсаҡты төрлөсә уйната: йоҡлата, ашата, атлата... Шул рәүешле уның менән тормош тәжрибәһен “үтә”, тиҫтерҙәре һәм өлкәндәр менән аралашырға, уйларға, ниндәйҙер һығымта яһарға, серләшергә өйрәнә.

Балаларҙың ҡурсаҡ яратҡанын иҫәпкә алып, уларға уйынсыҡты бихисап материалдан эшләү мөмкин­леген, төрлө милләт вәкиле, әкиәт персонажы итеп кейендереп булыуын, йәш буйынса ла айырылыуын күрһәтеү маҡсатында Өфө районы­ның Шамонин ауылындағы “Аҡбу­ҙат” балалар баҡсаһында ҡурсаҡтар конкурсы үткәрҙек. Ата-әсәләрҙең ижади хыялына иҫ китерлек! Ниндәй генә ҡурсаҡ яһамаған улар! “Ҡурсаҡ әбейҙәр” башлыса йомшаҡ туҡыманан тегелгән. Сағыу ептәр менән бәйләнгән уйынсыҡтар төрлөлөгө менән күҙҙең яуын алды. “Әкиәт ҡурсаҡтары” – өй һаҡла­ғыстар, Мәскәй әбейҙәр, ҡуяндар...

“Башҡорт ҡурсағы” номинация­һына тапшырылғандары айырыуса ижади ҡомар менән яһалған ине. Уларҙа башҡорт халыҡ кейеменең бөтә камиллығы, матурлығы са­ғылды. “Әсәй, атай һәм мин” номи­на­цияһында фанеранан эшләнгән бик матур башҡорт кейемендәге өләсәй, ҡартатай, атай, әсәй һәм ейәндәр бар.

Балсыҡтан әүәләнгән ҡурсаҡтар ҙа үҙенсәлекле. Ҡулында бәпәй бәүетеп ултырған әсәй-ҡурсаҡ балаларға айырыуса оҡшаны. Заманса эшләнгән уйынсыҡтар араһында бәйләнгәндәре күпсе­лекте тәшкил итте. Фоамирандан эшләнгәне лә үҙенә ылыҡтырҙы – ул фабриканан сыҡҡан ҡурсаҡтан бер ере менән дә айырылмай. Тағы ла пластилин, ҡағыҙ – ҡулланылған әйберҙәр төрлө-төрлө ине. Был балаларыбыҙҙың, атай-әсәйҙәрҙең фантазияға бай икәнен, конкурс талаптарына етди ҡарағанын, бәлә­кәс­тәрен ихлас яратҡанын тағы ла бер тапҡыр иҫбатланы.

Күркәм башланғысыбыҙҙы башҡа балалар баҡсалары ла ихлас ҡабул итер тип ышанабыҙ. Кескәйҙәргә халҡыбыҙҙың бай сәнғәтен, ижадын тапшырайыҡ.


Вернуться назад