Юлаевсыларҙың рәттән биш тапҡыр еңеүенә һөйөнгән көйәрмән тағы ярыҡ ялғаш янында ҡалды. Шишәмбелә КХЛ беренселегендә артта ғына һөйрәлгән “Амур”ҙан отолоп ҡуйҙылар (1:4).

Ябай көйәрмәнгә ни кәрәк инде – яратҡан командаһы күберәк мәрәй йыйһын. Бына “Салауат Юлаев” та уңышлы уйнай башлағас, кәйефтәр көрәйеп китте. Әммә, иғтибарлап ҡа­раһаң, элекке хаталарҙан арына алмай хоккейсыларыбыҙ. Ҡайһы бер етешһеҙлектәр дөйөм еңеү күләгә­һен­дә юғалып ҡала, ә отолоу арҡаһында, киреһенсә, кемдеңдер тырышҡаны күренмәй.
Мәҫәлән, Никлас Сведберг. Насар ҡапҡасы түгел. Ләкин команда матчта абынһа, шунда уҡ уның ҡапҡаһына ингән шайбалар күҙгә салына. Ә ниңә һаҡсылар ярҙамлашмай, ниңә һөжүм итеүселәр күберәк гол индермәй?
Һаҡ һыҙығы беҙҙә бөтөнләй аҡһай. Яй ҡыланалар, сослоҡ юҡ. Был йүнә­лештәге бер генә уйынсы ла үҙ эшен еренә еткереп башҡармай. Былтыр Кирилл Кольцов менән маҡтандыҡ. Йәнәһе, иң күп гол индергән һаҡсы. Миҙгел аҙағында үҙе шул номинация­ла бүләк тә алды. Аҙға ғына уның һаҡсы (!) икәнен онотоп ебәрҙек, буғай. Ә быйыл ни ышаныслы итеп ҡапҡа һаҡламай, ни голдары юҡ. Ет­мәһә, штраф эскәмйәһенә йыш эләгә... Иптәштәре Филипп Метлюк, Сами Леписте, Денис Бодров та боҙға ниндәй маҡсат менән сығалыр – уныһы ла беҙгә ҡараңғы.
Һөжүм итеүселәрҙән Сергей Соин, ҡаршы команда ҡапҡаһына шайба ташлау урынына, штраф эскәмйә­һен­дә ыштан туҙҙыра. Оҫта ҡуллы Дмитрий Макаров менән Теему Хартикайнен да ниңәлер мәргәнлектәрен юғалт­ты. Бары тик Линус Умарк менән Николай Прохоркинға ғына дәғүә юҡ тип әйтергә була. Ғөмүмән, һөжүм итеү­селәр шайбаны аҙ индерә. 12 ос­ра­шыу уҙҙы. Умарктың иҫәбендә – биш, Григоренко менән Прохоркиндың дүртәр голы теркәлгән. Матч һайын башлыса бер-ике тапҡыр ғына уңыш­ҡа өлгәшеп, әллә ни алыҫ китеп булмаясаҡ.
Аптырағандан шаяртыуға күсәм: көс йыйыр өсөн – бутҡаны, күҙегеҙ мәр­гәнерәк күрһен тиһәң, кишерҙе күберәк ашағыҙ, юлаевсылар!