4-се лицейҙың “Шторм” ҡыҙҙар баскетбол командаһы “КЭС-Баскет” мәктәп баскетбол лигаһы ярышында Волга буйы федераль округы буйынса чемпион исемен яуланы.

Баймаҡ һылыуҙарының ҙур еңеүе республика ғына түгел, округ төбәктәре өсөн дә көтөлмәгән яңылыҡ булды. Беҙҙең ҡыҙҙар илгә яҡшы билдәле Ҡазан, Пенза, Һарытау, Һамар ҡалалары, Мордва Республикаһы командаларын бер-бер артлы тар-мар итә баш­лағас, был спортсыларҙың тренер­ҙары картанан Баймаҡты эҙләп тапҡан. Бәләкәй генә ҡаланан килгән ҡыҙҙарҙың шундай юғары кимәлдә уйнай алғанына хайран ҡалғандар.
“Шторм” командаһының тренеры Р. Муҡаев әйтеүенсә, ул был еңеүгә 15 йыл буйы әҙерләнгән.
– Ҡыҙҙар аҙнаһына бер нисә мәртәбә генә түгел, ә йыл әйләнә­һенә алһыҙ-ялһыҙ шөғөл­ләнә. Йәй­геһен башҡа балалар ял иткәндә лә, күнекмәләр менән мәшғүлдәр, – ти ул.
Эйе, еңеү яулау өсөн ошондай ауырлыҡтар аша үтергә кәрәктер. Һөҙөмтәлә ҡара тир түгеп әҙер­лә­неүҙең емеше ифрат татлы булды бит!
Юғары кимәлдә ойошторолған ярышта мәртәбәле ҡунаҡтар, билдәле спортсылар ҡатнашҡан. Еңеүсе командаларға миҙалдарҙы Светлана Антипова, Ирек Зарипов кеүек Олимпия чемпиондары тап­шырған. Баймаҡ баскетболсылары Элиза Исмәғилева, Анастасия Захватова, Нәйлә Сәйетҡолова иһә Волга буйы федераль округы буйынса иң шәп уйынсылар тип таныл­ған.
Ҙур еңеү яулаған ҡыҙҙарҙы ҡар­шылауҙы баймаҡтар ашҡынып көттө. Тыуған ҡалаһына төнгө сәғәт 3-тә ҡайтып еткән һылыу­ҙарҙы үҙәк майҙанда ҡаршы алдылар, улар өсөн салют атылды.
Шулай итеп, беҙҙең ҡыҙҙар Рәсәй кимәлендә Ульяновск ҡала­һында “КЭС-Баскет” мәктәп баскетбол лигаһының финалында Волга буйы федераль округы намыҫын яҡлау хоҡуғын алды. Һынатмағыҙ!