Һеҙҙән – емеш-еләк, беҙҙән – металл » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Йәмғиәт » Һеҙҙән – емеш-еләк, беҙҙән – металл

Һеҙҙән – емеш-еләк, беҙҙән – металл 29.04.2015 // Йәмғиәт

Яҙ етеү менән йөҙәрләгән Үзбәкстан гражданы республикабыҙға эшкә килә. Әлбиттә, уларға тейешле документтар хәстәрләп йөрөү еңелдән түгел. Ошо мәшәҡәтте, шулай уҡ башҡа мәсьәләләрҙе тиҙерәк хәл итеү өсөн беҙҙә Үзбәкстандың генераль консуллығын булдырыу кәрәк. Был илдең Рәсәйҙәге Ғәҙәттән тыш һәм тулы хоҡуҡлы илсеһе Аҡмал Камалов менән Өфөләге осрашыу ваҡытында Башҡортостан Башлығы ошондай тәҡдим менән сығыш яһаны.

Республика ШОС һәм БРИКС халыҡ-ара саммиттарында ҡатнашасаҡ ҡунаҡтарҙы ҡаршыларға әҙерләнә. Сарала Үзбәкстандан да делегация көтөлә. Әлеге осрашыуҙа һүҙ сәнәғәт, ауыл хужалығы предприятиелары, йүнселдәр араһында ике яҡлы бәйләнеште үҫтереү хаҡында барҙы.
– Беҙ машина эшләү, нефть һәм газ эшкәртеү ҡорамалдары, сеймал тәҡдим итә алабыҙ, – тине Рөстәм Хәмитов. – Әле Салауат катализатор, Белореттағы Көньяҡ Урал бизмән заводтары тауарҙарын Үзбәкстанға сығарыу хаҡында һөйләшеүҙәр алып барыла. Бынан тыш, экспортҡа ит-консерва, киптерелгән һөт, иген, ҡарабойҙай ярмаһы, шулай уҡ минераль ашламалар оҙатырға әҙербеҙ.
Аҡмал Камалов хеҙмәттәшлекте үҫтереү өсөн киң мөмкинлектәр барлығы тураһында белдерҙе.
– Йыл башынан ауыл хужалығы продукцияһын даими илтеп һатыуҙы көйләү маҡсатында Рәсәйҙең күп төбәктәрендә йөрөнөк. Әммә Башҡортостанға сәфәребеҙ иң уңышлыһы булды тип һанайым, – тине ул.
Әйткәндәй, былтыр Башҡортостан менән Үзбәкстан араһында тауар әйләнеше 127,2 миллион, шул иҫәптән экспорт – 71,6 миллион, импорт 55, 5 миллион доллар тәшкил иткән. Республикала Үзбәкстан ҡатнашлығында 78 предприятие эшләй.

Автор: В. ИСХАҠОВ.

Баҫып сығарырға