Халыҡтар берҙәмлеге – республикабыҙҙың төп үҫеш нигеҙе.

“Өммәтебеҙ берҙәмлеге, башҡа халыҡтарға ҡарата ихтирамлы булыуы менән көслө”, – тигән мәғәнәлә һүҙ әйтер булған пәйғәмбәребеҙ Мөхәммәт ғәләйһис-сәләм. Уның хәҙистәрендә бындай аҡылдар бихисап.

“Эй, әҙәм балалары! Мин һеҙҙе бер атанан, бер әсәнән яралттым”, – тиелә Ҡөрьәндә. Шул уҡ ваҡытта Аллаһ Тәғәлә үҙенең хикмәте ме­нән кешеләрҙе төрлө ҡәүемгә бүлгән. Телдәребеҙҙең төрлөлөгө – кеше­ләрҙең бер-береһе менән танышыуы, аралашыуы, шулай уҡ мәғри­фәт­те, фәнде үҫтереү, уңыш-ҡаҙа­ныштарҙы уртаҡлашыу, яҡшылыҡ таратыу өсөн.

Бөгөн донъяла булған һәр мил­ләт үҙен күтәрергә, ҡеүәтен артты­рырға тырыша. Был йәһәттән Ҡөрьән­дә ошолай аңлатыла: “Һеҙ­ҙең иң хөрмәтлегеҙ – Аллаһ Тәғә­ләнең ҡанундарын күберәк үтәгән милләт”. Беҙҙең республикала, әл-хәмдү лил-ләһ, һәр халыҡ вәкиленә динен, башҡа рухи ҡиммәттәрен өйрәнеүгә, уларға таянып йәшәүгә ҙур мөмкинлек бирелә. Башҡорт­остандағы йөҙҙән ашыу милләт бер-береһе менән дуҫ-татыу ғүмер итә, Ватанын бергәләп үҫтереүгә күп көс һала.

Яуланған уңыштар менән ҡәнә­ғәт булып йәшәмәй республика хал­ҡы, ә гелән камиллыҡҡа, юғары­лыҡҡа ынтыла. Пәйғәмбәребеҙ Мөхәммәт ғәләйһис-сәләм дә бит бер мөбәрәк хәҙисендә үҫештән туҡтамаҫҡа бойорған. “Әгәр ҙә ки өммәтемдең ике көнө бер тигеҙ икән, был – ҙур отолош”, – тигән ул. Тимәк, алға барған һайын һәр яҡлап үҫешергә, ғилемебеҙҙе, һөнәрҙәребеҙҙе арттыра барырға бурыслыбыҙ.

Төрлө халыҡ вәкилдәренең үҙ илен, ерен яратыу – уның бөгөн­гөһө һәм киләсәге өсөн өлөшөн индереүе ул. Әҙәм балаһы, Исламда айырыуса ир-ат, Ватанының һәр яҡлап ал­ға барыуына булыш­лыҡ итергә бурыслы. Шул уҡ ваҡытта тарихты хөрмәт итеү зарур. Үткәндәрен бел­гән халыҡтың ғына киләсәге бар. Ошо хәҡиҡәткә таянып, респуб­ликабыҙ халҡы тарихына ла иғти­барлы. Изге төйә­гебеҙҙе һаҡлауға, уны үҫтереүгә өлөш индергән ҡаһармандары­быҙҙың, бөйөк шәхес­тәребеҙҙең яҡты рухына хыянат итмәй, бөгөнгө тормошобоҙҙоң, уңыштарыбыҙҙың, бер-береһенең ҡәҙерен белеп, иманға ынтылып йәшәй улар.

Тимәк, иншаллаһ, тыуған Баш­ҡортостаныбыҙҙың киләсәге яҡты булыр. Йәштәребеҙ әҙәп-әхлаҡ, милләт-ара татыулыҡ мөхитендә хәйерле ғилем алыуын, мөхәббәт нигеҙендә ғаилә ҡороуын, һау-сәлә­мәт, тәрбиәле балалар үҫтереүен дауам итер, илебеҙ тыныс булыр. Ватаныбыҙҙың именлеге, үҫеше – төрлө милләт вәкилдәренең ҡулға-ҡул тотоношоп бергә йәшәүендә, хеҙмәт итеүендә.