– 1949 йылдан бирле был урамда йәшәйем. Совет осоронда, Вилданов етәксе булған саҡта асфальт түшәгәндәрен хәтерләйем. Йыл һайын юлдағы соҡорҙарҙы ремонтлап торҙолар. Әле яңы асфальт һалыуҙарын ҡыуанып ҡарап ултырабыҙ. Билдәләр һыҙып матурлағас, тағы ла килеп ҡарарһығыҙ, – тип ҡыуанысы менән уртаҡлашты 84 йәшлек Мария Ерошина.


Раевка ауылының Дзержинский урамында дүрт саҡрым юлды яңыр­тасаҡтар. Асфальт түшәме ике ҡаттан тора: беренсеһе – биш сантиметр ҡалынлыҡта юлды тигеҙләү, икенсеһе – дүрт сантиметрлыҡ асфальт-бетон менән ҡаплау. Төҙө­лөш эштәрен тендерҙа еңеп сыҡҡан Әлшәй юл ремонтлау-төҙөлөш идаралығы алып бара.
Шулай уҡ предприятие Раевка­ның Икмәкле тыҡрығында 700 метр арауыҡҡа асфальт түшәй. Бынан тыш, юлсылар ауылдағы төҙөк­ләндереү эшендә лә әүҙем ҡатна­ша. Тыныслыҡ урамында юл сите кәртәләре ҡуйыла, ҡырсынташ, асфальт һалына. Тиҙҙән Ленин урамында йәйәүлеләр өсөн тротуар эшләй башлаясаҡтар.
– Предприятие менән эште яҡшы белгән Рафаэль Рәсүл улы Нурҡаев етәкселек итә. Идаралыҡтың заказдары етерлек, тендерҙарҙа еңеп сығабыҙ. Шулай уҡ күперҙәрҙе рәтләү кеүек эштәр ҙә өҙлөкһөҙ алып барыла, – ти мастер Рәсим Мөхәмәҙиев.
Рәсим Борис улының эш стажы бөтәһе 46 йыл булһа, шуның 20-һен юл төҙөлөшөнә арнаған. Тәжрибәле мастер хеҙмәттәштә­ренән юл эшсеһе Николай Мальцевты, Сергей Дмитриевты, түшәүсе машинист Олег Скуловты, юл катогы машинисы Анатолий Герасимовты, Рушан Әбитовты, асфальт ташыусы водителдәр Юрий Копьевты, Владимир Дергуновты, Филүз Ғари­повты маҡтап телгә алды. Шулай уҡ ирҙәр менән бер шарттарҙа асфальт түшәү эшендә Алевтина Рябых һынатмайса тир түгә.
Һуңғы йылдарҙа республика етәкселеге муниципаль юлдарҙы төҙөүгә, ремонтлауға ҙур иғтибар бирә. Киләсәктә лә ошондай ҡараш кәмемәҫ, хәл тағын да яҡшырыр, тип ышана юлсылар.
Әйткәндәй, Башҡортостан Хөкү­мәтенең 6 июндә ҡабул иткән 250-се ҡарарына ярашлы, республикала төбәк һәм муниципаль-ара юлдар оҙонлоғо 13598,7 кило­метр­ҙан 13619 километрға тиклем артҡан. Былтыр автомобиль юлда­рының айырым участкаларын реконструкциялап, паспортлаштырып, инвентаризациялап, кадастр эштәре үткәреп, муниципаль милектәге дөйөм ҡул­ла­ныуҙағы юлдарҙы – респуб­ликаға, ә төбәктекен муниципаль милеккә тапшырылған. Айырып әйткәндә, Ишембай – Воскресенск – Мәләүез юлында – 1,8, Мораҡ – Побоище юлында – 3,9, Вознесенск – Саруа юлында 0,7 километр юл муниципаль ми­леккә бирелһә, “Кама йылға­һындағы причал – Нефтекама станцияһы – Товарная” юлы республика милкенә күсерелгән. Башҡарып сыҡҡан эш һөҙөм­тәһендә автомобиль юлдарының оҙонлоғо, исеме, улар үткән муниципаль райондар тураһында мәғлүмәт асыҡланған.

Әлшәй районы.