Вконтакте facebook facebook Вконтакте Вконтакте
Гәзитте ойоштороусылар:
Башҡортостан Республикаһы
Дәүләт Йыйылышы — Ҡоролтай,
Башҡортостан Республикаһы Хөкүмәте
» » Тәүәккәл Ғариф
Тәүәккәл ҒарифМаҡсаттары булғандар ғына тормошта бейеклектәр яулай. Ә уның нигеҙендә хыял ята. Манышты ауылында йәшәүсе эшҡыуар Ғариф Сафа улы Мырҙағәлин күптәнге хыялдарын тормошҡа эҙмә-эҙлекле ашыра.
Үҙгәртеп ҡороуҙар башланғас, депола машинист ярҙамсыһы булып эшләп йөрөгән Ғариф Сафа улы 90-сы йылдарҙа эштән китеп, үҙенең шәхси предприятиеһын асырға баҙнат итә. Ағас менән шөғөлләнә: таҡта яра, бура бурай. Ул саҡта ағасҡа ҡытлыҡ булмағас, аяҡҡа баҫырға ла өлгөрә.
Ниндәй башҡорт атһыҙ булһын инде: Ғариф та йылҡысылыҡ менән шөғөлләнеү хыялын йөрөтә. 1998 йылдан аҙлап ҡына йылҡы тота башлай. Ә 2006 йылда ҡатыны Рима Нурмөхәмәт ҡыҙы Мырҙағәлина исеменә крәҫтиән (фермер) хужалығын асалар. Асы ауылына киткән юл буйында ҡуртымға ер алып, ныҡлап йылҡы үрсетә, ҡымыҙ етештерә башлайҙар.
Ғариф Мырҙағәлиндең хыялдары күп. Шуларҙың береһе — башҡорт атын үрсетеү. Ошо ниәттә ул Әбйәлил районынан бейәләр, айғыр һатып ала. “Был йылҡының үҙенсәлектәре, үлсәмдәре бар. Мәҫәлән, бейеклеге буйынса 1,5 метрҙан артмаҫҡа тейеш”, — ти хужа. Ғариф Сафа улы йылҡыларына бонитировка (сифат яғынан баһалау) үткәрткән. Мәскәүҙән раҫлау килһә, ул тоҡомсолоҡ хужалығы асырға йыйына. Былтыр йәй буйы 16 бейә һауып, ҡымыҙ бешеп һатҡандар. Бейәләрҙе тормош иптәше Рима Нурмөхәмәт ҡыҙы ла һауа, икенсе йыл Зөбәржәт Ғәләметдин ҡыҙы Фазылова ярҙамлаша. Улар етештергән продукцияларын Асыға киткән юл буйындағы махсус урында һата.
Йылҡы ирек ярата, шуға ла хужа уларҙы бикләмәҫкә тырыша. Әммә һуңғы ваҡытта бүреләр йонсота икән. “Ветеринар ярҙамы кәрәк булған саҡта Инйәрҙән Илгиз Шәрәфетдинов менән Берештән Фират Ҡунаҡбаев ярҙамға килә. Уларға рәхмәт”, — ти Ғариф Мырҙағәлин.
“Күптәр ауыл хужалығы, эшҡыуарлыҡты үҫтереү маҡсатында дәүләттән субсидия, ташламалы кредиттар менән файҙалана. Ә һеҙҙең ошондай ярҙам алғанығыҙ булдымы?” — тип ҡыҙыҡһынабыҙ.
— Ундай матди ярҙам алған юҡ. Үҙ көсөбөҙ менән тырышабыҙ. Төрлө тикшереү органдары ыҙалата. Яңыраҡ сүп-сар өсөн 20 мең һум штраф һалып киттеләр. Асының тирә-яғы ла ял итеү зонаһына әйләнде. Өфө, Магнитогорск ҡалаларынан ял итеүселәр күпләп килә һәм арттарынан тау-тау сүп-сар ҡалдыралар. Былтыр ике автомашина ҡый, сүп-сар сығарып түктем. Инйәр буйы сүплеккә әйләнгән. Экологтар бына шундай тәртипһеҙ ял итеүселәрҙе яуаплылыҡҡа тарттырһын ине, — тип үҙен борсоғаны менән дә уртаҡлашты Ғариф Сафа улы.
Үҙенсәлекле кешеләр иҫәбенә индерергә мөмкин Мырҙағәлинде. Уның менән аралашҡанда уҡ үҙ еренә ереккән булыуы, ата-бабалар кәсебен тергеҙеү хыялы менән янып йәшәүе күренеп тора. Әле лә солоҡсолоҡ менән шөғөлләнеү, ял итеүселәрҙе атта йөрөтөү маршруты асыу кеүек хыялдары бар. Әйткәндәй, Ғариф Сафа улы йәмәғәт эшендә лә әүҙемлеге менән айырылып тора. Ауылдаштары уны Инйәр Советына депутат итеп һайлаған.
Тыуған ауылына мәсет, хоккей ҡабы төҙөүе лә фиҙакәрлеге хаҡында һөйләй. Былтыр өмә ойоштороп, зыяратты ла ипләткән. “Ағас бирһәләр, мин ауылға клуб та төҙөр инем”, — ти ул, изге ниәттәре менән уртаҡлашып.
Мырҙағәлиндәр ғаиләһендә өс бала үҫә. Өлкән ҡыҙҙары Лира Башҡортостан дәүләт аграр университетында белем ала. Улдары Юлай — ХI класс уҡыусыһы, ә Аҫылғужа I класта белем ала. Улар ҙа ата-әсәһенең уң ҡулы, буш ваҡыттарында хужалыҡта ярҙамлашалар. Тимәк, ата-әсәһенә алмаш үҫә.
Ғариф Сафа улы менән хушлашҡанда: “Йылҡысылыҡ менән шөғөлләнеү һәр кемдең көсөнән килә. Шуға башҡалар ҙа был эшкә ҡыйыу тотонһон ине”, — тигән изге теләктәрен әйтеп ҡалды. Ысынлап та, ниңә тәүәккәлләмәҫкә?..
Рәмилә МУСИНА.
Белорет районы.




Беҙҙе Яндекс Дзен лентаһында уҡығыҙ

В ОдноклассникахВконтакте

Комментарий өҫтәргә






Халыҡ һорай, тимәк, кәрәк

Халыҡ һорай, тимәк, кәрәк 30.03.2019 // Эшҡыуар

Хәҙер магазин кәштәләре һөт ризыҡтарынан һығылып тора. Ниндәйе генә юҡ уларҙың: ситтән...

Тотош уҡырға 208

Көмөш йөҙөк – ҡул күрке, оҫта – донъя тотҡаһы
Беҙ һыната торғандарҙан түгел...

Беҙ һыната торғандарҙан түгел... 19.03.2019 // Эшҡыуар

Республикала крәҫтиән (фермер) хужалыҡтарын үҫтереү маҡсатында байтаҡ эш башҡарыла. Әленән-әле был...

Тотош уҡырға 399

Буҙаны сит тарафтарҙа танытырға теләй

Буҙаны сит тарафтарҙа танытырға теләй 03.03.2019 // Эшҡыуар

Сибай ҡалаһынан йәш әсә Гөлназ Азатова милли эсемлектәребеҙҙең береһен етештерә....

Тотош уҡырға 507

Кәңәшле эш тарҡалмаҫ

Кәңәшле эш тарҡалмаҫ 28.02.2019 // Эшҡыуар

Башҡортостан Башлығы вазифаһын ваҡытлыса башҡарыусы Радий Хәбиров бөгөн Өфөләге “Торатау”...

Тотош уҡырға 219

Төньяҡ-көнсығыш  нисек йәшәй?

Төньяҡ-көнсығыш нисек йәшәй? 26.02.2019 // Эшҡыуар

Дыуан районында Башҡортостандың төньяҡ-көнсығышында бәләкәй һәм урта эшҡыуарлыҡты, хужалыҡ итеүҙең...

Тотош уҡырға 200

Ҡаҙмаш сәйе һатыуға сыға
Баҫыу-баҫыу еләк-емеше  емерелеп уңа...

Баҫыу-баҫыу еләк-емеше емерелеп уңа... 20.02.2019 // Эшҡыуар

Шаран фермеры баш ҡала баҙарын да яулаған....

Тотош уҡырға 507

Әбеш һөтө хәҙер яңғыҙ түгел

Әбеш һөтө хәҙер яңғыҙ түгел 16.02.2019 // Эшҡыуар

Һуңғы йылдарҙа экологик яҡтан таҙа, сифатлы аҙыҡ-түлеккә иғтибар артты. Ошоға бәйле ауыл йүнселдәре...

Тотош уҡырға 699

Хәйбулла билмәне Өфөгә лә етер

Хәйбулла билмәне Өфөгә лә етер 30.01.2019 // Эшҡыуар

Билмән, итле, кәбеҫтәле мантылар, ҡаҙы, тултырма, бишбармаҡ, туҡмас – барыһын да үҙҙәре әҙерләп...

Тотош уҡырға 741

Ағас ене ҡағылған егет

Ағас ене ҡағылған егет 23.01.2019 // Эшҡыуар

Туғандар ҡеүәтләһә, юлың уңа....

Тотош уҡырға 1 486

Эше барҙың ашы бар,  йәшәү өсөн дәрте бар

Эше барҙың ашы бар, йәшәү өсөн дәрте бар 11.01.2019 // Эшҡыуар

Был һүҙҙәрҙең хаҡлы булыуы Үзбәковтар миҫалында асыҡ күренә....

Тотош уҡырға 520