Ихлас хәстәрлек өлгөһө09.10.2018
Бөгөн балыҡсылар тураһында ярайһы күп һөйләйбеҙ. Әммә тәбиғәткә зыян килтергән браконьерҙар тураһында ла оноторға ярамай, минеңсә.

Ҡармаҡ менән тот­ҡан­дан балыҡ кәмемәй. Һуңғы йылдарҙа иһә ау, йылым, электр ҡармағы менән аулау бермә-бер арта төштө. Сәбәбе нимәлә? Беренсенән, баҙарға барып йәнең теләгән ауҙы һатып алырға мөмкин. Икенсенән, һыу ятҡылыҡтарын һаҡлаған инс­пек­торҙарҙың хәле әллә ни шәптән түгел. Уйлап ҡарағыҙ: алты-ете районға берәү яуап­лы. Ниндәй көрәш тураһында һүҙ барһын инде?!

Ошолар хаҡында уйлап йөрөгәндә, бер танышымды осраттым. Азат Миңлеғәлиев атлы егет. Браконьер­ҙарҙы ене һөймәй, шуғалыр ҙа уларға ҡаршы шәхси ойошманы етәкләй. Йәмәғәт башлан­ғысында эшләгән­лектән, бөтә кәрәк-яраҡ үҙҙәренеке. Моторлы кәмәләре менән йылға-күл буйҙарына сығып, браконьерҙарҙы күҙәтәләр, ауҙарын тартып алалар, тейешле органдарға хәбәр итәләр һ.б. Ғөмүмән, тәбиғәтте һаҡлауға ҙур өлөш индерә егеттәр.

Шул уҡ ваҡытта миҙалдың икенсе яғы бар бит әле: ниңә ошондай хәстәрлекле, маҡ­сатлы кешеләргә тейешле органдар аҙ булһа ла ярҙам ҡулы һуҙмай икән? Мәҫәлән, яғыулыҡ менән тәьмин итергә мөмкин бит. Тәбиғәтебеҙҙе һаҡларға, һыуҙарыбыҙҙа балыҡ булһын өсөн көрәшкән ирекмәндәргә дәрт­ләндереү сараһы булды­рырға кәрәк тәһә. Йәнә ирекһеҙҙән шул хаҡта уйлап ҡуяһың: егеттәр үҙ ғүмерен ҡурҡыныс аҫтына ҡуя бит. Мәҫәлән, Ҡомлокүл буйында таңдан көтөп ултырып, 25 ау тартып алғандар бер мәл.

– Бергә йөрөгән иптәштә­ремә рәхмәт: ямғыр аҫтында ҡалһалар ҙа, өшөһәләр ҙә, эшен аҙағына еткерә беләләр, – ти Азат Миңлеғәлиев.
Егеттәр һәр эшкә полицияны, прокуратураны йәлеп итә. Рейдтар үткәреп, ҡорамалдар һатылған кибеттәрҙе лә тикшерәләр, тәртип боҙған­дарҙы яуапҡа тарттырырға ярҙам итәләр. Фиҙакәр эштәрендә уңыштар юлдаш булһын!


Вернуться назад

Яндекс.Метрика