Башҡортостанда Ғимаев Кубогына хоккей буйынса турнир йыл һайын үткәреләсәк

Башҡортостанда Ғимаев Кубогына хоккей буйынса турнир йыл һайын үткәреләсәк. Был хаҡта республика Радий Хәбиров хөкүмәттең оператив кәңәшмәһендә хәбәр итте. 

– Кисә Өфөлә Сергей Ғимаевтың 70 йыллығына арналған хәйриә уйынында Ғимаев Кубогына турнирҙы йыл һайын үткәрергә ҡарар иттек. Балалар өсөн шәп спорт байрамы буласаҡ, – тине Радий Хәбиров.   

Иҫегеҙгә төшөрәбеҙ, кисә Өфөлә уҙған «Ғимаев Кубогы» хәйриә матчына донъяның билдәле хоккейсылары Илья Ковальчук, Павел Дацюк, Алексей Морозов, Сергей Мозякин һәм башҡа йондоҙҙар ҡатнашты. Спорт сараһын БР хөкүмәте вице-премьеры вазифаһын башҡарыусы – спорт министры Руслан Хәбибов, билдәле хоккейсы Вячеслав Фетисов и Сергей Ғимаевтың улы – хоккейсы Сергей Ғимаев асты.

«Сергей Ғимаевтың 70 йыллығына арналған турнир үткәреү бөтә республика өсөн оло мәртәбә. Сергей Ғимаев спорт карьераһын тап ошонда башлаған. СССР-ҙың халыҡ-ара класлы спорт мастеры, Рәсәйҙең атҡаҙанған тренеры исемдәренә лайыҡ булған. Беҙ уны шулай уҡ абруйлы спорт комментаторы булараҡ хәтерләйбеҙ. Сергей Ғимаев илебеҙ спорты үҫешенә ҙур өлөш индерҙе. Ғәҙел, асыҡ һәм талапсан кеше ине. Уның «Барығыҙ һәм алышығыҙ!» тигән ҡанатлы һүҙҙәре бөгөн хоккей һәм спорт өсөн генә түгел, барыбыҙ өсөн дә, айырыуса ил һағында торған егеттәребеҙ өсөн бик актуаль», – тине Руслан Хәбибов. 

Хәйриә матчы данлыҡлы хоккейсы Алексей Морозовтың командаһының 8:7 иҫәбенә еңеүе менән тамамланды. Еңеүселәр составында Александр Гуськов ике шайба индерҙе, шулай уҡ Илья Ковальчук, Вячеслав Буцаев, Евгений Давыдов, Вячеслав Фетисов, Игорь Щадилов һәм Андрей Зюзин берешәр мәрәй яуланы.

Павел Дацюктың командаһында Максим Афиногенов һәм Максим Спиридонов – икешәр, Дацюк үҙе, Игорь Григоренко һәм кесе Сергей Ғимаев берешәр шайба индерҙе.

Ғимаев Сергей Наил улы – Туймазы районының Кәкребаш ауылы башҡорто. Танылған хоккейсы 2017 йылдың 18 мартында Тула ҡалаһында СССР хоккейы ветерандары матчы барышында вафат булды. Туймазы ҡалаһындағы боҙ һарайы уның исемен йөрөтә, ошонда уҡ 2019 йылда шәхескә арналған музей булдырылған.  

Бынан алда «Башинформ» юлаевсыларҙың «Авангард»ҡа еңелеүе хаҡында яҙҙы.

https://www.bashinform.ru/news/sport/2025-01-13/v-bashkirii-proydyot-ezhegodnyy-turnir-po-hokkeyu-na-kubok-gimaeva-4081572