Элек дуҫтар менән рәхәтләнеп сана шыуҙыҡ, онотолоп китеп сәкән һуҡтыҡ йәки бүтән төрлө ҡыҙыҡлы уйындар ойошторҙоҡ. Ошо турала бөгөн йәштәргә һөйләһәң, күптәре ышанмай. Заман башҡа – заң башҡа тигәндәй, әле ауылда урам буйлап йөрөгән үҫмерҙе осратыуы ҡыйын. Улар ата-әсәһенә ярҙамлаша, көнө буйы мәктәптә белем эстәй йәки башҡа кәрәкле шөғөлгә йәлеп ителгән тип маҡтарға һис кенә лә ашыҡмай тороғоҙ. Ә инде кемдер, бөгөн күп кенә малай һәм ҡыҙҙар интернет ҡолона әйләнгән, ти икән, фекере дөрөҫ.

Үҫеп килгән йәш быуынды компью­терҙан аралау юлдары бармы? Әл­биттә, заман сиренән арын­дырырға мөмкин. Мәҫәлән, Ҡалтай ауылында йәш-елкен­сәкте илһө­йәрлек рухында тәрбиәләү өсөн ағалы-ҡустылы Ғил­ма­нов­тар, көсөн дә, ваҡытын да йәлләмәй, төрлө сара ойош­тора.
– Айырыуса ауыл бала­ла­рының сыҙамлылығы, сәмселлеге хайран ҡал­дыра мине, – тип һөйләй “Витязь-Юниор Спартак” хәрби-патриотик клубы етәксеһе Рөстәм Ғил­ма­нов. – Маҡсат – улар кү­ңе­лендә тупланған бына ошо күркәм си­фаттарҙы һаҡлау, үҫеш өсөн уңай­лыҡтар тыуҙырыу. Бына әле һәр бере­һенең ҡы­ҙыҡ­һыныуы йөҙөнә сыҡ­ҡан. Йү­нәлеш биреп кенә өл­гөр – күтәреп алырға әҙер һәммәһе лә. Ҡул кө­рәше, кикбоксинг, ушу-саньда, бокс, шулай уҡ хәр­би туризм, шахмат, футбол буйынса һынатмайҙар. Ҡал­тай урта мәктәбе беҙ­ҙең клуб менән хеҙмәт­тәшлек итә. Үҙ сиратында уҡыу­сылар команда спортында, полиатлон, йүгереү, атыу һымаҡ ярыштарҙа һәр саҡ призлы урындарҙы ала.
Күмәкләгән – яу ҡайтар­ған, тиҙәр. Балаларҙы ил­һө­йәрлек рухында тәрбиә­ләү ниәтен Рөстәм Фәнүз улы бер туған ағаһы, “Ҡал­тай-Агро” яуаплылығы сик­ләнгән йәмғиәте директоры Дамир Ғилманов менән бергә тормошҡа ашыра. Улар бөгөн – тыуған ауы­лы­ның терәге: йәш быуын­дың киләсәген ҡайғыртып, ауылдаштарына ярҙам итергә тырышып йәшәйҙәр. Ҡайһы бер мәктәптәрҙә спорт залдары буш тор­ғанда, ябай ғына бер ауылда физкультура-спорт үҙә­генә тиң клуб эшлә­һенсе! Ғәжәп бит! Уның асылыуы бындағы көнитмеште, хатта ки донъяға ҡарашты ту­лыһынса тиерлек үҙгәрт­кән. Ә изге ғәмәлдәрҙең барыһы ла ташландыҡ магазин бинаһына икенсе ғүмер биреүгә барып тоташа. Данлыҡлы Ғилма­нов­тар өсөн уны йүнәтеп, йыһазландырыу сүп кенә булып тойолған. Бынамын тигән келәмдәр, бирсәт­кәләр, ҡалҡандар, бокс грушалары һәм башҡа әй­берҙәр һатып алыу – шуға асыҡ миҫал.
Дамир Ғилмановтың билдәләүенсә, малайҙар күңеленә бәләкәстән Ва­танға һөйөү уятһаң, ил һаҡ­сыһы булырға ынтылыу си­фаттарын һалһаң, ар­мияға бармай ҡалырға маташыусылар кәмейәсәк, һәр кем ил алдындағы бурысын үтәргә атлығып торасаҡ.
Клубты икенсе төрлө сынығыу үҙәге тип атарға ла мөмкин. Бөгөн утыҙға яҡын баланың яратҡан урынына әйләнгән ул. Күнекмәләргә йөрөү бушлай, ярыштарға сығыуҙы ла бында алдан хәстәрлә­гәндәр. Ҡыҫҡаһы, йәштәр­ҙең, ата-әсәләрҙең кеҫәһе­нән бер тин дә аҡса сыҡ­май. Балалар менән күнек­мәләрҙе Өфөнән Сергей Евграфов үткәрә.
Тренерҙар ҡыҙ-егеттәр­ҙе бокс һәм көрәш серҙә­ренә өйрәтә. Ҡапыл тыуған киҫкен хәлдә берәү ҙә юға­лып ҡалмаҫҡа, киреһенсә, унан тиҙ генә сығыу юлдарын белергә тейеш.
Төрлө бәйгеләрҙә ҡат­на­шыу – һәр кемдең хыялы. Мәҫәлән, ҡалтайҙар, Өфөләге ярыштарҙан тыш, Волга буйы федераль округы һәм ил кимәлендә уҙғарылған ярыштарҙан да ситтә ҡалмай, алдынғы урындарҙы яулап ҡыуан­дыра.
Спорт мастерлығына кандидаттар үҫә бында, егет һәм ҡыҙҙар төрлө разрядтар яҡлай. Иң мөһиме – үҫмерҙәрҙең байтағы артабан тормошон хәрби хеҙ­мәт менән бәйләй. Алыҫ китәһе түгел, “Витязь-Юниор Спартак” хәрби-патриотик клубына тәүге көндәрҙән йөрөгән, спорт мастерлығына кандидат булған Илвир Ғәлләмов хәҙер Ҡазан юғары хәрби танк училищеһында белем ала.