Ҡалала грипп айҡанлы карантин иғлан ителһә лә, “Өфө-Арена” халыҡ менән шығырым тулы. Бәләкәй балалар, үҫмерҙәр ҙә күп. Барыһы ла Александр Радуловты күрергә килгәйне.

Күрҙеләр, тик боҙҙа уйнағанын тү­гел, ә трибунала ултырғанын. Ғөмүмән, был көндә аренала билдәле кеше­ләр байтаҡ ине. Данлыҡлы хоккейсы Ирек Ғимаев, күренекле биатлонсы Максим Чудов... Ә юлаев­сылар­ҙың лидеры Линус Умарктың тыуған көнө. Ҡыҫ­ҡаһы, ҡайҙа баҡма – байрам!
Көйәрмәндәрҙе ҡыуанды­рып, өфөләр шунда уҡ шайбаны эләктереп алып һөжүм башланы. Бына капитаныбыҙ Игорь Григоренко ҡунаҡтар­ҙың ҡапҡа­сыһын ныҡлыҡҡа һынап ҡара­ны. Уның артынса Александр Логинов, Максим Майоров, Сами Леписте ла мәргәнлеген күрһәтә алманы. Голдар күр­мәгәс тә, күңелһеҙ булманы. Тәүге осор аҙа­ғында Денис Хлыстов йоҙроҡ ярҙамында Игорь Ожигановҡа “ҡунаҡ булһаң – тыйнаҡ бул” әйтемен төшөн­дөрөп маташты.
Икенсе осорҙа ла шайба ҡапҡаға “инергә теләмәне”. Александр Нестеров, Сергей Соин уңайлы мөмкинлектәрҙе ҡулдан ысҡындырҙы. Әһә, күп­селектәбеҙ. Бынан алда­ғы­һында фәтүә булмағайны, әле лә йүнле-рәтле һөжүм итә алмайҙар түгелме? Ана, ҡапҡа алдында эткеләшеү-төрт­көләшеү китте. Го-о-о-ол! 1:0! Афарин, Денис Хлыстов! Аренаның буйынан-буйына һуҙыл­ған экранда Радуловҡа төбәлгән “Саня, ҡайт өйгә!” тигән яҙыу йүгер­ҙе...
Һуңғы хәл иткес егерме минут. Уңышты ны­ғы­тырға кәрәк. Их, Линус Умарктың Сергей Со­инға адреслан­ған кән­фит-пасы бушҡа булды. Максимдар ҙа – Гончаров ме­нән Майоров – хаталанды. Өҫтәүенә Денис Бодров йә­рәхәт алып ҡуйҙы. Ваҡ­ла­ныр­ға ярат­маған Умарктың да түҙем­леге шартлап һынды шикелле – Никита Пивцакин менән һуғышып алды.
Йә, ЦСКА бер шайба ин­де­рәме-юҡмы? Әллә лидер­ҙарһыҙ быға хәлдәренән кил­мәйме? Юҡ, “Салауат Юлаев” ныҡ тор­ҙо. Ҡунаҡтар еңелде, ә трибунала ҡыҙыу Радулов асыуын ҡайҙа ҡуйырға бел­мә­не... Ысынлап та, ҡайт, Саня!