“Ҡыуырға кәрәк бөтәһен дә!” Рәттән бишенсе матчта отолғас, “Салауат Юлаев” көйәрмәндәре араһында ризаһыҙлыҡ көсәйҙе. Матур тамаша талап иткән кешене тынысландырып ҡара...

Ут күршебеҙ “Нефтехимик” ко­ман­даһына ла овертаймда отолғас (1:2), юлаевсыларға бер генә юл ҡалды. Йә киләһе уйында еңеп, көйәрмән ышанысын йәнә яуларға, йә сираттағы әрләү һүҙҙәрен ише­тергә. Түҙемлек шартлап һынырға ғына тора.
Дәғүәсе лә бирешергә теләмәй – Ҡаҙағстандың “Барыҫ”ы плей-офҡа эләгеү маҡсаты менән яна. Әле бы­ның өсөн уларға бер генә мәрәй етмәй. Тренерҙары ла – уҫаллығы менән даны сыҡҡан Ан­дрей Назаров.
Осрашыу башланыуға иркен тын алдыҡ. Ҡунаҡтарҙың йоҙроҡ алышы оҫтаһы Дамир Рыспаев уйнамай. Юғиһә был тафгайҙың беҙҙең бер-ике уйынсыны сафтан сығарғанын көт тә тор. Йәшәйбеҙ икән!
Әммә тәүге осор­ҙо 3:1 иҫәбенә та­мамлауыбыҙға ҡара­маҫтан, кәйеф төшә. Һаҡсы­ла­ры­быҙ эште боҙа бит, әй. Ярты минут эсендә ике шайба индереп, “Барыҫ” иҫәпте тигеҙләп тә ҡуйҙы – 3:3. Роман Дерлюк менән Филипп Метлюктың икеһенән бер яҡшы хоккейсы сыҡһасы! Юҡ шул. Уйлауы ла ҡур­ҡыныс, ҡалған алты һаҡсының берәйһе йәрәхәт алып ҡуйһа? Сәс ағарасаҡ икән әле...
Артабан йәш уйынсыбыҙ Степан Хрипуновтың КХЛ-да тәүге голына ла оҙаҡ ҡыуанып өлгөрмәнек. Ҡунаҡтар йәнә иҫәпте тигеҙләне – 4:4. Ярай әле матч аҙағында Олег Сапрыкиндың шәхсән оҫталығы хәүефте юҡҡа сығарҙы – 5:4. Әйт­кән­дәй, был уның КХЛ-дағы 500-сө уйыны ине. Тимәк, үҙенә шәп бүләк яһаны.
Чемпионат ахырынаса дүрт осрашыу ҡалды. Плей-офф уйындарын Владивосток ҡалаһының “Адмирал”ы менән башларбыҙ, ахыры.
Гөлдәр БҮЛӘКБАЕВА.