Белорет районында «Урал легендаһы» Башҡортостандың тау курорттары» туристик-рекреацион кластер төҙөлөшөн тормошҡа ашырыу буйынса кәңәшмә үтте.

Сарала Башҡортостандың Дәү­ләт Йыйылышы – Ҡоролтайҙың Аграр мәсьәләләр, экология һәм тә­биғәттән файҙаланыу комитеты рәйесе урынбаҫары Руфина Шаһа­пова, республика парламенты рәйесенең торлаҡ сәйәсәте һәм инфраструктура үҫеше буйынса урын­баҫары Вячеслав Аброщенко, Белорет районы хакимиәте баш­лығы Владислав Миронов, Баш­ҡортос­тандың тәбиғәттән файҙа­ланыу һәм экология министры урынба­ҫа­ры Илдус Яхин, Башҡорт­остан­дың Эшҡы­уарлыҡ һәм туризм буйынса дәүләт комитеты рәйесе урынбаҫары Роман Шәйхетдинов, экологтар, ғалимдар, ошо өлкәлә эшҡыуарлыҡ менән шөғөлләнеү­селәр ҡатнашты.
– 2015 йылдың майында турис­тик-рекреацион кластерҙың кон­цепцияһын әҙерләй башланыҡ. Республика Башлығы Рөстәм Хәмитов уҙғарған кәңәшмәлә Белорет рай­­о­нында эске туризмды үҫтереү йү­нәлештәрен булдырыу бурысы йөкмәтелде. Беҙгә тотош Рәсәйҙән туристарҙы йәлеп итергә кәрәк. Эшсе төркөмгә Белорет һәм Әб­йәлил райондары хакимиәте, «Аб­ҙаҡ», «Морат» һәм «Яҡтыкүл» тау саңғыһы үҙәктәре, «Тәңре» экология берләшмәһе, «Ар ташы» ял базаһы вәкилдәре һәм башҡалар инде. Бөгөнгә концепция әҙер, ул Эш­ҡыуарлыҡ һәм туризм буйынса дәүләт комитеты аша республика етәкселегенә тәҡдим ителәсәк, – тине Владислав Миронов.
Кластерҙың нигеҙе – «Морат», «Абҙаҡ» һәм «Яҡтыкүл» үҙәктәре. Улар Рәсәй баҙарында яҡшы билдәле, иң мөһиме – бер-береһенә яҡын урынлашҡан. 2014 йылда 336 мең кеше уларҙың канат юлы хеҙ­мәттәре менән файҙаланған. Эшмә­кәрлектәре Урал һәм Себер билә­мәһендә «Урал легендаһы» Баш­ҡортостандың тау курорттары» кластерының конкурентлыҡҡа һәләтен тәьмин итергә мөмкинлек бирә.