Өфөлә йәшәүсе Ольга Люкина, йәш кенә булыуына ҡарамаҫтан, шәфҡәтлелек акцияларында ихлас ҡатнаша, дуҫтарын да изгелек ҡылырға өндәй. Быйыл августа ул “Бала бәхете” фондын булдыра һәм үҙе лә мәрхәмәтлек сараларын ойоштора башлай. Йәмғиәт ҡарауһыҙ ҡалған, юл-транспорт ваҡиғаһында зыян күргән, хәмер ҡолона әүерелгән балалар һәм үҫмерҙәрҙә даими хәстәрләй. Дүрт ай эсендә Ольга шуны асыҡларға өлгөргән: баҡһаң, мәрхәмәтлек ойошмалары үҙҙәре үк ярҙамға мохтаж икән.
Бөгөн Башҡортостанда 223 хәйриә йәмғиәте эшләй, уларҙың 47-һе быйыл теркәлгән. Күренеүенсә, республикала изгелек ҡылырға теләүселәрҙең иҫәбе арта. Беҙҙә мәрхәмәтлектең үҫә барыуын аныҡ эштәр ҙә иҫбатлай. Быға инаныр өсөн Иглин районының Урман ҡасабаһы халҡына шартлауҙан һуң үҙ ваҡытында ҙур матди һәм рухи ярҙам күрһәтелеүен иҫкә төшөрөү ҙә етә. Башҡортостан Президенты Рөстәм Хәмитов мәрхәмәтлек эшмәкәрлеге мәсьәләләре буйынса Республика Советы ултырышында хәйриә йәмғиәттәренең әүҙемлеген, ихласлығын билдәләне, уларҙы борсоған мәсьәләләр менән танышты.
Совет ағзалары волонтерҙар мәктәбенең үҫешеп етмәүен, йәштәрҙе изге эштәргә күпләп йәлеп итергә кәрәклеген әйтте. Мәрхәмәтлек ҡылыусы ойошмаларҙың һалымдан азат ителмәй башлауы ла фондтарҙың эшенә кире йоғонто яһай. Хәйриә йәмғиәттәрен берләштерерҙәй, халыҡҡа уларҙың эшмәкәрлеге тураһында һөйләрҙәй махсус баҫма сығарырға кәрәк тигән фекер ҙә яңғыраны. Өфө һәм Стәрлетамаҡ архиепископы Никон йәшәр урыны, туҡланыр мөмкинлеге булмағандар өсөн ашхана, ваҡытлыса торлаҡ ойоштороу мәсьәләһен күтәрҙе.
Башҡортостандың хеҙмәт һәм халыҡты социаль яҡлау министры Ленара Иванованың белдереүенсә, 2012 йылдың беренсе яртыһына әҙерләнгән план проектында был мәсьәләләр тулыһынса иҫәпкә алынған.
– Шәфҡәтлелек, кеше хәленә инә белеү йәмғиәтебеҙҙә ғәҙәти күренешкә әүерелһен ине, – тине Рәсәй мосолмандарының Үҙәк диниә назараты рәйесе мөфтөй Тәлғәт Тажетдин.
Әгәр изге эштәргә үҙ өлөшөгөҙҙө индерергә теләһәгеҙ, иртәгә, 18 декабрҙә, көндөҙгө сәғәт 12-нән 5-кә тиклем Өфөнөң “Простор” сауҙа үҙәгенә барырға һәм “Бала бәхете” фонды ойошторған хәйриә акцияһында ҡатнашырға саҡырабыҙ.