Гәзит һәм журналдарға яҙылыу барған осорҙа әлегә ҡәҙәр “Башҡортостан”ды алдырған уҡыусыларыбыҙға, артабан да беҙҙән айырылмағыҙ, тип өндәшәбеҙ. Өҫтөнлөктө нәҡ баҫмабыҙға биргәндәре өсөн рәхмәтле булыуыбыҙҙы еткерәбеҙ. Шуларҙың береһе — Иглин районының Түбәнге Ләмәҙ ауылында йәшәгән Илтүҙәр Харунов.

Хөрмәтле ир-уҙаман “Башҡортостан” гәзитен оҙаҡ йылдар алдыра. Баҫмабыҙҙы 1960 йылдан уҡый, ә 1975 йылдан үҙе лә мәҡәләләр яҙа.
Ауылдаштары уны элек-электән тынғыһыҙ, һәр мәсьәләгә етди ҡарашлы кеше булараҡ белә һәм ихтирам итә. Ошо төбәккә ҡағылған күп кенә проблемалар уның ҡатнашлығында хәл ителә, тип әйтергә мөмкин. Тыуған ауылы, ер-һыуы яҙмышына һис ҡасан битараф ҡалмай. Хеҙмәт юлының байтаҡ өлөшө мәктәп һәм балалар менән бәйле үткән аҡһаҡал өсөн иң мөһиме — тәртип, яуаплылыҡ.
Һәр кем үҙ өҫтөндә эшләргә, ә бының өсөн көн дә тиерлек ҡулына гәзит-журнал тоторға тейеш. Уҡымау, заман менән бергә атларға ынтылмау наҙанлыҡҡа, битарафһыҙлыҡҡа, тағы ла яманырағы — маңҡортлоҡҡа килтерә, тип иҫәпләй ул.
Был йәһәттән күптәнге уҡыусыбыҙ — ауылдаштарына матур өлгө. Илтүҙәр ағай түҙмәгән, киләһе ярты йыллыҡта ла “Башҡортостан” гәзите менән бергә ҡалыу өсөн август башында уҡ яҙылып та ҡуйған.