Салауат ҡалаһы егете Рөстәм Вәлиев, йәш булыуына ҡарамаҫтан, һынлы сәнғәт өлкәһендә ҙур уңыштар яулай. Әле ул — Шолохов исемендәге Мәскәү дәүләт гуманитар университетының Стәрлетамаҡ филиалында дизайн факультеты студенты.

Рөстәмдең төп ижади йүнәлеше — портрет төшөрөү. Тәүге картиналарын ул ҡәләм, ретуш, сепия ярҙамында төрлө ҡағыҙға, обойға, хатта гипс-ҡатырғаға төшөрә башлай. Беренсе портретында ҡәләм менән актер Гери Олдманды һынландыра.
Ваҡыт үтә килә Рөстәм арт-стрит (урам һынлы сәнғәте) менән мауыға башлай, тәүҙә асфальтта француз актеры Жан Реноның портретын яһай. Бының өсөн ҙур түҙемлек кәрәк, бер портретты төшөрөү 3-5 сәғәт ваҡытты ала, шулай уҡ 30-60 киҫәк аҡбур китә.
Рөстәм 30 июндән 1 июлгә тиклем Санкт-Петербургта үткән I халыҡ-ара “Петербург буяуҙары” урам һынлы сәнғәте фестивалендә Башҡортостан һәм Салауат ҡалаһы исеменән ҡатнашып ҡайтты. Фестивалдә һәр ҡатнашыусы 3D эффектында асфальтта һүрәт төшөрөргә тейеш булһа, Рөстәм 2D-ла аҡ-ҡара төҫтәрҙә киң билдәле поп-йырсы Леди Гаганы төшөрә, был һүрәтте ул 17 сәғәт, йәғни ике көн буйы эшләй.
Рәссам бының менән генә туҡтап ҡалырға теләмәй, киләсәктә лә һынлы сәнғәт менән шөғөлләнеүен дауам итмәксе.