Республиканың һаулыҡ һаҡлау министры табиптарға пациенттарҙың ялыуҙары өсөн шелтә белдерҙе

«Башинформ»ға билдәле булыуынса, Өфө ҡалаһының 3-сө балалар стоматология поликлиникаһының һәм Благовещен үҙәк район дауаханаһының баш табиптары шелтә алды.

Быға кисә хөкүмәттең оператив кәңәшмәһендә ҡаралған пациенттарҙың ялыуҙары сәбәпсе булды – балаға пластинка ҡуйҙырыу өсөн бер йыл сират көтөү һәм 95 йәшлек Бөйөк Ватан һуғышында ҡатнашыусыны тикшереү менән бәйле проблемалар.

Сығанаҡтар мәғлүмәттәре буйынса, дисциплинар яза — беренсе аҙым. Әгәр учреждениеларҙың эше яҡшырмаһа һәм ялыуҙар ҡабатланһа, етәкселәр эштән бушатыла.

Хәтерегеҙгә төшөрәбеҙ, үткән аҙнала республиканың һаулыҡ һаҡлау министры дауахана етәкселәре пациенттар менән дөрөҫ һәм ихтирамлы аралашмаһа, уларға ҡарата ҡаты саралар күрергә ниәтләүен белдерҙе. Хөкүмәттең оператив кәңәшмәһендә Айрат Рәхмәтуллин медицина учреждениеларында системалы проблемаларҙы хәл итеү өсөн «Иғтибар үҙәгендә» тигән проектты асыу тураһында иғлан итте.

Бынан алдараҡ Башҡортостан Башлығы Радий Хәбиров пациенттарға ҡарата тупаҫ мөнәсәбәт өсөн табиптарҙы һәм етәкселәрҙе «тура эфирҙа» эштән бушатасағын белдерҙе.