Бөгөн Башҡортостанда бер юлы ике әһәмиәтле ваҡиға билдәләнә, уларҙың һәр береһе республикабыҙҙың матурлығын һәм үҙенсәлеген асып бирә.

Йыл һайын апрелдең өсөнсө йомаһында Башҡортостан халыҡтарының милли кейеме көнө билдәләнә. Был көндә тотош республикала, илдә һәм донъяла Башҡорт теленән халыҡ-ара диктант яҙыу символик мәғәнәгә эйә.

Республика Башлығы Радий Хәбиров социаль селтәрҙәге сәхифәһендә ошо хаҡта иҫкә төшөрҙө. Ул диктантты акция ғына түгел, ә башҡорт телен ихлас яратҡандарҙың һәммәһен дә берләштергән хәрәкәт тип атаны.

«Бөгөн донъяның 15 илендә һәм 30 төбәктә диктант яҙҙылар. Акцияла «Башҡортостан» полкы яугирҙәре лә ҡатнашты», — тип билдәләне Радий Хәбиров.

Быйыл диктант текстары Рәсәй халыҡтары берҙәмлеге йылына, шулай уҡ республикала иғлан ителгән Ҙур һәм татыу ғаилә йылына арналды.

Төбәктең төп көсө — үҙ тамырҙарына хөрмәт күрһәтеүҙә, тип билдәләне Башҡортостан Башлығы халыҡҡа мөрәжәғәтендә.

«Беҙ Башҡортостанда халыҡтарыбыҙҙың тарихын, йолаларын, телдәрен һаҡлайбыҙ. Был ата-бабаларыбыҙ васыят иткән һәм юғалтырға хоҡуғыбыҙ булмаған ҙур байлыҡ», — тип белдерҙе Радий Хәбиров.

Уның башҡорт телендәге һүҙҙәре хәбәргә айырыуса тәьҫирлелек өҫтәне.

«Туған тел — һәр кем өсөн рухи моң, ә милли кейем — халыҡтарҙың үҙенсәлекле йөҙөн сағылдырған ҡомартҡы. Ошо төрлөлөктөң матурлығын күрә белеү, уға ихтирам — Башҡортостаныбыҙҙағы дуҫлыҡтың нигеҙе. Ә дуҫтарҙың татыулығы — еңелмәҫ көс. Байрам менән!»