Башҡортостан Башлығы Яҡын Көнсығышта туристар өсөн ярҙам саралары тураһында һөйләне

Башҡортостан Башлығы Радий Хәбиров хөкүмәттең оператив кәңәшмәһендә хәҙерге ваҡытта Яҡын Көнсығыш илдәренән ҡайта алмаған туристар проблемаһына иғтибарын йүнәлтте. Ул республика хөкүмәте ағзаларына бөтә мәсьәләләрҙе өйрәнергә ҡушты.

– Тура бәйләнеш булырға тейеш. Беҙҙә ситуация үҙәге эшләй. Кешеләр унда эш буйынса бармаған, әммә улар беҙҙеке, – тип билдәләне республика етәксеһе.

Башҡортостан халҡы төрлө һорауҙар менән 8 (347) 218-19-19 телефоны аша республиканың Ситуация үҙәгенә мөрәжәғәт итә ала.

Бынан тыш, Радий Хәбиров илдә Башҡортостандың Ғәрәп Әмирлектәрендәге вәкиле эшләүен әйтте: Громов Роман Владимирович, уға ла яҡташтарыбыҙҙың проблемалары менән шөғөлләнеү бурысы йөкмәтелгән. Башҡортостандың Берләшкән Ғәрәп Әмирлектәрендәге вәкиле менән бәйләнешкә сығыу телефоны: 7 (919) 619-99-90 (МАХ мессенджеры аша).

Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева әле ниҙәр эшләнеүе хаҡында һөйләне:

– Ял көндәрендә беҙгә 25-кә яҡын граждан мөрәжәғәт итте. Бөтәһе лә иҫән-һау, ойоштороу-техник мәсьәләләр бар: күсенергә ярҙам итеү, яңы урын табыу, туроператор менән бәйләнешкә инеү. Беҙ тура бәйләнеш ойошторҙоҡ. Әгәр турист үҙаллы килгән икән, генераль консуллыҡ аша сайтта ғариза тултырырға кәрәк, беҙ бөтә ҡағиҙәләрҙе әҙерләнек. Туроператор аша булһа, беҙ улар менән бәйләнешкә сығырға ярҙам итәбеҙ, бөтә мәсьәләләрҙе улар хәл итә. Әмирлектәрҙәге ҡайһы бер штаттар йәшәү ваҡытын оҙайта, ә ҡайһы берҙәре юҡ. Йәшәргә урын табырға ярҙам итәбеҙ. Кемдер ҡыйын хәлдә ҡалған икән, беҙҙең вәкил Роман Владимировичтың тура номеры бар, ул унда яҡташтарыбыҙ менән тура бәйләнештә, – тине министр.

Яҡын Көнсығышта хәлдең киҫкенләшеүенә бәйле Берләшкән Ғәрәп Әмирлектәренән ҡайта алмаған граждандар өсөн тәҡдимдәрҙе рәсми сайттағы һылтанма буйынса белергә мөмкин.

https://www.bashinform.ru/news/social/2026-03-02/glava-bashkirii-soobschil-o-merah-pomoschi-dlya-turistov-na-blizhnem-vostoke-4598273