Башҡортостан Башлығы Беларусь менән мәктәп туризмы программаһын булдырыу хаҡында һөйләне

Башҡортостан Беларусь Республикаһы менән берлектә уҡыусылар өсөн алмашыу буйынса ял ойошторҙо.

Башҡортостан Башлығы Радий Хәбиров Беларусь менән мәктәп туризмы программаһын булдырыу хаҡында һөйләне. Республика етәксеһе һүҙҙәренсә, «Берҙәмлек көсө» профилле сменаһы — ошо йүнәлештәге тәүге ҡарлуғастарҙың береһе.

«Был көндәрҙә Рәсәй Геройы Максим Серафимов исемендәге «Патриот» хәрби-патриотик паркында ата-әсәләре Минск автомобиль заводында эшләгән 20 уҡыусы ял итә. Тарихыбыҙ, йолаларыбыҙ, ғөрөф-ғәҙәттәребеҙ, аш-һыуыбыҙ менән таныша, иҫтәлекле урындарға бара, илһөйәрлек сараларында ҡатнаша. Улар беҙҙең ҡунаҡсыл республикабыҙ тураһында яҡшы тәьҫораттар менән ҡайтыр тип ышанам.

Ә кисә Башҡортостандан 20 уҡыусы Белоруссияға килде. Улар араһында – олимпиада, конкурс, конференция призерҙары һәм еңеүселәре, йәштәр хәрәкәттәре активистары. Улар МАЗ ҡарамағындағы балалар лагерында ял итә. Бай программа әҙерләнгән, шул иҫәптән автозаводҡа, «Хатынь», «Дан ҡурғаны», «Сталин линияһы» мемориаль комплекстарына, Бөйөк Ватан һуғышы тарихы музейына һәм башҡа бик күп объекттарға барыу ҡаралған», — тип билдәләне Радий Хәбиров.

Республика етәксеһе һүҙҙәренсә, Белоруссияла тарихҡа ихтирам менән ҡарайҙар, һуғыш осоро ваҡиғалары һәм геройҙары тураһында хәтерҙе һаҡлайҙар.

«Ошо илгә барып ҡайтыуҙы мин патриотик тәрбиә биреүҙең мөһим өлөшө тип иҫәпләйем. Әлеге башланғыс өсөн Рәсәйҙең Белоруссиялағы сауҙа вәкиллеге ҡарамағындағы Башҡортостан вәкиле Константин Климинға, Минск автомобиль заводының генераль директоры Валерий Иванковичҡа һәм үҙебеҙҙең Мәғариф министрлығына рәхмәт белдерәм», — тип йомғаҡ яһаны Хәбиров.

https://www.bashinform.ru/news/social/2025-08-14/glava-bashkirii-rasskazal-o-sozdanii-programmy-shkolnogo-turizma-s-belarusyu-4349415