Өфөлә Радий Хәбиров Антон Котяков менән эшлекле осрашыу үткәрҙе

4 июлдә Өфөлә Башҡортостан Башлығы Радий Хәбиров Рәсәйҙең хеҙмәт һәм социаль яҡлау министры Антон Котяков менән осрашты. Республика Башлығының матбуғат хеҙмәте хәбәр итеүенсә, көн тәртибендә — мәшғүллек хеҙмәтен һәм дәүләткә ҡарамаған социаль хеҙмәтләндереү секторын үҫтереү, шулай уҡ республикала махсус хәрби операцияла ҡатнашыусыларға ярҙам саралары.

— Башҡортостан халыҡты эшкә урынлаштырыу өлкәһендә Рәсәйҙең Хеҙмәт һәм социаль яҡлау министрлығы менән һөҙөмтәле эшләй, — тип билдәләне Радий Хәбиров. — Беҙ илдә тәүгеләрҙән булып модулле мәшғүллек үҙәктәрен төҙөй башланыҡ. Ә республикала ошондай 51 учреждение яңыртылды.  

Антон Котяков республиканың халыҡты эшкә урынлаштырыу мәсьәләләре менән шөғөлләнгән үҙәктәрҙе яңыртыу буйынса уңыштарын юғары баһаланы.

 —Тап Башҡортостан модулле төҙөлөш башланғысы менән сығыш яһаны, — тип билдәләне министр. — Һеҙҙең тәжрибәне тормошҡа ашырыу һөҙөмтәһендә был федераль көн тәртибенә индерелде.

Осрашыуҙа Антон Котяков һәм Радий Хәбиров яңы социаль объекттар төҙөү, атап әйткәндә, «Именлек» республика геронтология үҙәгенең яңы корпусы мөмкинлектәрен тикшерҙе.

Дәүләткә ҡарамаған социаль хеҙмәтләндереү секторы мәсьәләләренә айырым иғтибар бүленде. Башҡортостан был форматты әүҙем үҫтерә, төбәктә биш пансионат дәүләт-шәхси партнерлыҡ сиктәрендә эшләй, тағы бер нисә учреждение сафҡа индерелергә тейеш. 

Антон Котяков инвесторҙарҙың социаль өлкәне үҫтереүҙә ҡатнашыуын хуплай.

Бынан тыш, яҡтар махсус хәрби операцияла ҡатнашыусыларға, шул иҫәптән социаль хеҙмәтләндереү, белем биреү, һаулыҡ һаҡлау, эшкә урынлашыуға булышлыҡ итеү, торлаҡ шарттарын яҡшыртыу өлкәһендә ярҙам күрһәтеү тураһында фекер алышты. Хәтерегеҙгә төшөрәбеҙ, Башҡортостанда ошондай 54 сара ғәмәлдә.

https://www.bashinform.ru/news/social/2025-07-04/radiy-habirov-i-anton-kotyakov-proveli-v-ufe-rabochuyu-vstrechu-4302357