Радий Хәбиров Башҡортостанда ҡалырға хәл иткән йәш ғалимдарға шәхсән ярҙам итергә вәғәҙәләне

Башҡортостан бер ҡасан да ошондай күп талантлы, сағыу йәш ғалимдарҙы ҡабул иткәне юҡ ине, республика өсөн был – оло мәртәбә.

Башҡортостан Башлығы Радий Хәбиров XIII Бөтә Рәсәй йәш ғалимдар һәм студенттар ғилми йәмғиәттәре советтары съезының пленар ултырышында ошо турала белдерҙе. Форум Өфөнөң «Торатау» конгресс-холында бара.

Республика етәксеһе форумды Өфөлә үткәрергә тигән ҡарар өсөн Рәсәй Федерацияһының фән һәм юғары белем биреү министрлығына рәхмәт белдерҙе.

«Башҡортостандың йәш ғилми берләшмәһе барлыҡ яңы ҡаҙаныштарҙы үҙләштерә һәм әүҙем үҫешә. Өфөлә ошондай күп талантлы йәштәрҙең йыйылыуы бик ҡыуаныслы. Әгәр ҙә кемдер, беҙҙә өс-дүрт көн булғандан һуң Башҡортостанда ҡалырға ҡарар итһә, мин үҙем шәхси үҫеш һәм уңыш траекторияһын билдәләрмен, һеҙгә ярҙам итермен», – тине Радий Хәбиров.

Хәтерегеҙгә төшөрәбеҙ, Башҡортостан өсөнсө йыл Милли фәнни-технологик үҫеш рейтингында ун төбәк иҫәбендә.

Республикала 4,5 меңдән ашыу тикшеренеүсе эшләй. Һәр бишенсеһе – 29 йәшкә тиклемге йәш ғалим.

Һуңғы 4 йылда Башҡортостан бюджетынан фәнгә ярҙам итеү өсөн 900 миллион һумға яҡын аҡса бүленгән.

Республика бюджетынан йәш аспиранттарҙың һәм фән кандидаттарының дөйөм суммаһы 90 миллион һумлыҡ 60 проекты һәм Евразия ғилми-белем биреү эшмәкәрлегенең өҫтөнлөклө йүнәлештәре буйынса 11 ғилми тикшеренеү хупланған. Донъя кимәлендәге 4 лаборатория булдырылған, уларҙы дөйөм финанслау күләме 300 миллион һум тәшкил иткән. Республика бюджетынан 531 ғилми-белем биреү стажировкаһын үтеүгә һәм 133 йәш ғалимдың торлаҡ шарттарын яҡшыртыуға 400 миллион һум аҡса йүнәлтелгән.

https://www.bashinform.ru/news/social/2025-07-02/radiy-habirov-lichno-podderzhit-reshivshih-ostatsya-v-bashkirii-molodyh-uchyonyh-4298611