Өфөлә «21-се мәктәп» асылды

10 июндә Евразия ғилми-белем биреү үҙәгенең вуз-ара студенттар кампусының Геном үҙәгендә «21-се мәктәп» асылды. Тантанала Башҡортостан Башлығы Радий Хәбиров һәм Рәсәй Һаҡлыҡ банкы президенты, идара рәйесе Герман Греф ҡатнашты.

«21-се мәктәп» — һанлы технологиялар мәктәбе 18 йәше тулған, һайлап алыу этаптарын уңышлы үткән кандидатҡа бушлай ИТ-һөнәр алыу мөмкинлеген бирә.

Өфөлә Һаҡлыҡ банкы «21-се мәктәп+» проектын Башҡортостан хөкүмәте менән берлектә тормошҡа ашыра.

Бөгөн беҙҙә оло ваҡиға һәм «21-се мәктәп»те асыу яңы мөмкинлектәр булдыра, тип билдәләне республика етәксеһе.

«Беҙҙең һәләтле йәштәр өсөн был бик кәрәк ине. Киләсәктә бында 5 меңдән ашыу егет-ҡыҙҙар белем алырға мөмкин», — тине Радий Хәбиров.

Рәсәй Һаҡлыҡ банкы президенты, идара рәйесе Герман Греф һүҙҙәренсә, Башҡортостан – көслө фәнни, интеллектуаль төбәк, сәнәғәте үҫешкән.

«Һеҙҙең кампуста Фәндәр академияһы, университеттар, индустриаль партнерҙар араһында тығыҙ партнерлыҡ. Беҙҙә (әлегә тиклем) йәнле системалар инженерияһы менән бәйле бер генә мәктәп тә юҡ ине. Өфөлә ғилми һәм етештереү ҡеүәте менән бәйле белгеслек уйланылған», — тип билдәләне Герман Греф.

Әлеге ваҡытта «21-се мәктәп» илебеҙҙең 14 ҡалаһында эшләп килә. Шулай уҡ 2024 йылдың ноябрендә Сеченов университетының һәм «21-се мәктәп»тең берлектәге кампусы асылды. Киләһе йылдарҙа илдең тағы бер нисә төбәгендә мәктәп кампустары үҙ ишектәрен асырға тейеш.

https://www.bashinform.ru/news/social/2025-06-10/v-ufe-otkryli-novyy-kampus-shkoly-21-4272217