Башҡортостан Башлығы ташҡындан һуң ауылды тергеҙеүҙе шәхсән тикшерергә йыйына

Архангел районы башлығы Айрат Сәйетғәлин 7 апрелдә хөкүмәттең оператив кәңәшмәһендә ташҡындан зыян күргән Аҙау ауылы халҡының ниндәй түләүҙәр алыуы тураһында һөйләне.

«Үткән аҙнала аҡса алдыҡ, тарата башланыҡ. Һәләк булған малдарҙың хужаларына – 29 кешегә тулыһынса түләнек. Ғаризалар буйынса тәү сираттағы ихтыяждар өсөн 5-әр мең һум таратыла, бөгөнгә 745 мең һумлыҡ түләүҙәр башҡарылды. 7 апрелдә иртән 9 йорт хужалығына юҡҡа сыҡҡан мөлкәт өсөн аҡса йүнәлттек. Был эште 10 апрелгә тиклем тамамлайбыҙ», — тип хәбәр итте Айрат Сәйетғәлин.

Башҡортостан Башлығы Радий Хәбиров был эш тамамланғас, хәбәр итергә ҡушты.

«Иң мөһиме, беҙ һеҙгә аҡса ебәрҙек. Әгәр күберәк кәрәк булһа, бүлербеҙ. Иң мөһиме, зыян күргән кешеләрҙең йорт-ҡуралары ғәҙел рәүештә тергеҙелергә тейеш», — тине Радий Хәбиров.

Башҡортостандың Торлаҡ-коммуналь хужалыҡ һәм Транспорт министрлығы ла ауылды тәртипкә килтереү эштәрен алып бара.

Эштәр тамамланғас, Башҡортостан Башлығы ауылды тергеҙеүҙә хеҙмәттәрҙең нисек ярҙам итеүҙәрен шәхсән тикшерергә йыйына.

«Барығыҙға ла һәр яҡлап ярҙам итергә әҙербеҙ. Аҡса түләнде. Хәҙер ауылды тәртипкә килтерергә кәрәк. Эште тамамлағас, барып ҡарарбыҙ. Халыҡ менән һөйләшербеҙ», — тип билдәләне Радий Хәбиров.

https://www.bashinform.ru/news/social/2025-04-07/glava-bashkirii-lichno-proinspektiruet-vosstanovlenie-derevni-posle-pavodka-4187306