Радий Хәбиров Башҡортостан ғалимдары алдына өс бурыс ҡуйҙы

5 февралдә Өфөлә Башҡортостан Башлығы Радий Хәбиров «Фән сәғәте»н үткәрҙе. Был сара Рәсәй Фәндәр академияһының Өфө федераль тикшеренеү үҙәгендә уҙҙы. Ғалимдар менән осрашыу Рәсәй фәне көнө алдынан ойошторола, тип билдәләне республика етәксеһе һәм республиканың ғилми берләшмәһен һөнәри байрамы менән ҡотланы.

«Күпселектә ғилми потенциалдың юғары булыуы һөҙөмтәһендә Башҡортостан алдынғы, сәнәғәт яғынан үҫешкән төбәктәр иҫәбенә инә. Өсөнсө йыл беҙ – Милли фәнни-технологик үҫеш рейтингында тәүге унау иҫәбендә. Рәсәй Фәндәр академияһының Өфө федераль тикшеренеү үҙәге – республиканың төп ғилми үҙәге, илдең алдынғы фәнни учреждениеларының береһе. Беҙҙең үҙәк көслө ғилми мәктәптәре, тармаҡ компетенцияларын үҫтереү үҙәктәре булған лидер ойошма тип танылды. 14 институт фәнни өлкәнең бөтә йүнәлештәрен тиерлек үҙ эсенә ала. Һеҙ мөһим тикшеренеүҙәр үткәрәһегеҙ, тәбиғи һәм техник фәндәр өлкәһендә ҙур асыштар яһайһығыҙ. Евразия социомәҙәни киңлегендә киң гуманитар, этнологик компетенцияларҙы үҫтерәһегеҙ», - тине Радий Хәбиров.

Үҙәк үҙенең үҫеше өсөн федераль аҡса йәлеп итте. Мәҫәлән, приборҙар базаһын яңыртыуға (2022 йылда – 203 миллион һум, 2024 йылда – 243,3 миллион һум), мега-лабораториялар асыуға (2021-2023 йылдарҙа – 90 миллион һум; 2024-2028 йылдарҙа – 500 миллион һум), мал аҙығы культуралары буйынса селекция-орлоҡсолоҡ үҙәген булдырыуға һәм үҫтереүгә (2021 йылда – 15 миллион һум). «Фән һәм университеттар» милли проекты ярҙамында 5 йәштәр лабораторияһы эшләй.

«Республика ла үҙәккә ярҙам күрһәтә. Йәш ғалимдарға, аспиранттарға айырыуса иғтибар бүләбеҙ. Ошо көндәрҙә мин «Йылдың йәш ғалимы» премияһын тапшырыу тураһында указға ҡул ҡуйҙым», - тине Радий Хәбиров.

Ул шулай уҡ Рәсәй Фәндәр академияһының Өфө федераль тикшеренеү үҙәге коллективы алдына өс бурыс ҡуйҙы.

«Беренсеһе – йәш ғилми кадрҙар әҙерләү. Университетты тамамлаусыларҙың күбеһенең карьераһын республика иҡтисадының фән һәм технологик секторҙары, фән менән бәйләүе беҙҙең өсөн бик мөһим. Улар менән ныҡлы эшләргә, ректораттар, уларҙың ғилми етәкселәре менән эш алып барыу зарур. 

Икенсеһе. Уҙған йылды аҙағында беҙ республиканың фәнни-технологик үҫеш дәүләт программаһын раҫланыҡ. Ғилми-технологик көн тәртибенә әүҙем ҡушылырға кәрәк.

Өсөнсөһө. Хөрмәтле коллегалар, беҙ һеҙҙә иҡтисадты һәм социаль өлкәне үҫтереүҙең төп мәсьәләләрендә хеҙмәттәштәр, партнерҙар күрәбеҙ. Һеҙҙең тикшеренеүҙәр башлыса иҡтисадтың, аграр тармаҡтың, социаль өлкәнең инновациялы секторҙары өсөн ғәмәли һөҙөмтәгә йүнәлтелгән булырға тейеш», - тип билдәләне Башҡортостан Башлығы.

https://www.bashinform.ru/news/social/2025-02-05/radiy-habirov-postavil-pered-uchyonymi-bashkirii-tri-zadachi-4109359