Республикабыҙҙың Шәйехзада Бабич исемендәге йәштәр, Салауат Юлаев исемендәге дәүләт премиялары лауреаты, шағир - философ, драматург Салауат Әбүзәрҙең аҡыллы драма әҫәрҙәрен режиссерҙар, театр репертуарына индереп, тамашасыларҙы лотерея отҡандай ҡыуандыра, тамаша залдары алҡыштарға күмелә. Авторҙың драма әҫәрҙәрендә, сәхнә шарттарына ярашлы, йәнле тормош бар, социаль проблемалар күтәрелә, эмоционаллек алғы планға сыға, актерҙар тамашасы һөйөүенә лайыҡ була…

Ғафури районының халыҡ театры үткән йылдарҙа Салауат Әбүзәрҙең “Байраҡ аҫтында” тигән комедияһын, “Усаҡ” тигән драмаһын сәхнә­ләштергән. Коллектив, яҡташ -авторҙың “Йәшлеккә ҡайтыу” пьесаһы буйынса бер шар­шау­лыҡ “Сәйнүк ҡайнап сыҡ­ҡан арала” тигән комедия-гротескын сәхнәгә ҡуйып, “Алтын тирмә” милли театр­ҙар­ҙың төбәк-ара фести­валендә 20 халыҡ театры араһында икенсе урынды яулай, лауреат булып ҡайта. “Театр төнө” акция­һында ла халыҡ театры актерҙары шул әҫәрҙе Яңғыҙҡайын ауыл клубында күрһәтә, тамашасыларҙың алҡышына күмелә.

Район мәҙәниәт йортонда ла шул уҡ комедияны ҡуйып, үҙешмәкәр халыҡ театры райондаштарын һөйөндөрә, сөн­ки төбәктә күптән билдә­лелек яу­лаған режиссер Зәйтүнә Зәйнәшева һәм ярҙамсыһы Гөлфирә Бәширова етәксе­легендәге коллективта төрлө һөнәрле сәнғәт һөйөүселәр шөғөлләнә. Әйтәйек, “Сәйнүк мажараһы” тип атағым килгән сәхнә әҫәрен беҙгә Стәрле­тамаҡ дәүләт драма театры һәм филармонияһы бина­һында ҡарарға насип булды. Фантазияға ҡоролған, бәлки, шул сәбәпле гротеск тип аталған әҫәр. Тәбиғәте менән лирик комедияға хас. Әҫәрҙә сәйнүк образы бик йыш телгә алына, сөнки тормошта бер ғаилә лә сәй эсмә­йенсә йәшәмәй. Актерҙар мә­рәкә итеп, сәйнүк тотоп бейей, башына ҡуйып әңгә­мә­ләшә, уны төшөрөп тә ебәрә...

Сюжет буйынса, сәйер ҡы­лыҡлы Мансур (Баш­ҡорт­остандың атҡаҙанған мәҙә­ниәт хеҙмәткәре Әнүәр Ғә­зизов) менән Әҡлимә (театр сәнғәте ветераны Рима Зәйнуллина) оҙаҡ йылдар татыу ғүмер иткән. Әммә Мансур бер көн тәҙрәнән йәштәр туйын күрә лә йәшлек хыялын тормошҡа ашырма­ғаны­на үкенә һәм бер көнгә булһа ла йәшлегенә әйләнеп ҡай­тырға ҡарар итә... Йәш Мансур (актер Фәнзил Ғәлиндең башҡарыу оҫталығына һоҡ­ланырлыҡ) эшһеҙлек, эш эҙ­ләү проблемаһына юлыға… Күршеләр араһында комик характерҙар асыла. Ҡарт Мансур үлгәндер тип, уны эҙләргә күршеләге дуҫы Зәйнулла, йәш Мансур һәм оло Мансурҙың ейәнсәре Ләләгә (артистка Эльвира Насирова) күҙе төшөп, өйлә­нергә уйлаған Илдар (артист Наил Вәлиев) сығып китәләр, тик ҡартты тапмайынса ҡай­талар. Һөҙөмтәлә мөхәббәт өсмөйөштәре лә хасил була, еңелсә көлөүгә нигеҙләнгән күренештәрҙә Ләлә йәш Мансурға ғашиҡ була, Илдар Ләләгә ғашиҡ, Зәйнулла ҡарт “мәрхүмдең” ҡатыны Әҡли­мәне яңғыҙ ҡалдырғыһы килмәй, тик “йәш Мансур” күрше ҡартын Әҡли­мә “әбе­йенә” яҡын ебәрмәй. Финалда ғына ҡарт Мансур “терелә”, ә йәш Мансур юҡ бу­ла. Илдар менән Ләлә бер­гә ҡала… Ҡыҫҡа­һы, халыҡ театры сәхнәләштергән комедия-гротеск комик хәл-ваҡиғаларға бай һәм мажаралы булды, иҫтә ҡалырлыҡ сағыу образдар ижад ителгән.