Ҡортсолар кәңәш ҡорҙо

Башҡортостан гәзите » Йәмғиәт » Ҡортсолар кәңәш ҡорҙо

Ҡортсолар кәңәш ҡорҙо 19.03.2019 // Йәмғиәт

Төп бурыс – “Апимондия”ны лайыҡлы ҡаршылау.

Уҙған ял көндәрендә Өфөлә Умартасыларҙың төбәк съезы үтте. Уның эшендә Рәсәй умартасыларының милли союзы президенты Арнольд Бутов, Башҡортостан Хөкүмәте Премьер-министры урынбаҫары вазифаһын башҡарыусы – ауыл хужалығы министры Илшат Фәзрахманов, ҡортсолоҡ өсөн кәрәкле ҡорамалдар етештергән предприятиелар, тармаҡ өсөн белгестәр әҙерләгән уҡыу йорттары етәкселәре, республиканың һәм күрше төбәктәрҙең умартасылары ҡатнашты.

Арнольд Георгиевич үҙ сығышында илебеҙҙә ҡортсолоҡ тармағын үҫтереү, донъя баҙарында тағы ла юғарыраҡ кимәлгә сығыу, был өлкәлә заманса алымдарҙы ҡулланыу һәм башҡа мөһим бурыстар тураһында һүҙ алып барҙы.

Башҡортостан Хөкүмәте Премьер-министры урынбаҫары вазифаһын башҡарыусы – ауыл хужалығы министры Илшат Фәзрахманов йыл һайын сентябрь айында Бал фестивале үткәрергә тәҡдим итте.

– Беҙҙә “Һөт иле” фестивален уҙғарыу матур йолаға әйләнде, шуның ише Өфөнөң берәй матур майҙанында сентябрҙең йылы көндәрендә, мәҫәлән, әбейҙәр сыуағы мәлендә, Бал байрамы үткәреүгә нисек ҡарайһығыҙ? – тип мөрәжәғәт итте ул съезда ҡатнашыусыларға. Умартасылар был тәҡдимде дәррәү ҡул сабыу менән хуплап ҡаршы алды.

Ғөмүмән, сара йәнле аралашыу рәүешендә барҙы, ҡатнашыусылар үҙҙәрен борсоған һорауҙарға яуап алды, тәҡдимдәрен еткерҙе. Күптәр 2021 йылда үтәсәк “Апимондия” конгресы алдынан киң мәғлүмәт сараларында тармаҡтың эшмәкәрлеген әүҙемерәк яҡтыртыу, телетапшырыуҙар сығарыу мөһимлеген белдерҙе.

Фойела тармаҡ ҡорамалдары, кәрәк-яраҡ, бал ҡорттарына тәғәйен препараттар менән танышырға мөмкин ине. Башҡортостан дәүләт аграр университетының ҡортсолоҡ, шәхси зоотехния һәм мал үрсетеү кафедраһы тәҡдим иткән методик әсбаптар, фәнни хеҙмәттәр һәм ҡорамалдар күптәрҙең иғтибарын йәлеп итте. Кафедра мөдире Фәрит Вәлитов менән профессор Варис Туҡтаров улар хаҡында ентекле һәм мауыҡтырғыс итеп һөйләне.

Төрлө райондарҙан килгән умартасылар үҙҙәре етештергән татлы продукцияны тәҡдим итте. Федоровка районының Оло Сытырман ауылында йәшәгән Мортаза Солтанғолов халҡыбыҙҙың был кәсебен олатаһы Хисаметдиндән һәм атаһы Мостафанан мираҫ итеп алған. Ул ағасты ырып, солоҡҡа оҡшатып эшләнгән умарталарға өҫтөнлөк бирә.

– Уларҙа йыйылған кәрәҙле бал тәме менән дә, сифаты менән дә айырыла, – ти тәжрибәле ҡортсо. Шулай уҡ Мортаза ағай әсәһе һәм өләсәһе кеүек бал балы эшләү оҫтаһы булып танылған. “Өләсәйемдең рецебын яҙып алып ҡалмағанға үкенәм. Әле мин эсемлекте үҙемсә самалап, төрлөсә һынап ҡарап эшләйем, әммә бер ниндәй ҙә әсетке ҡушмайым, ата-бабабыҙ яһағанса, тәбиғи ысулға өҫтөнлөк бирәм, – тип шифалы эсемлекте яһау серҙәре менән дә уртаҡлашты ул.

Ырымбур өлкәһенән килгән эшҡыуар Роман Кириков “Пчелометр” тип аталған заманса ҡорамал менән таныштырҙы. Ул умарталыҡтағы хәл-торош, дадандарҙа күпме бал йыйылыуы, ҡышҡы осорҙа ҡорттарҙы һаҡлау урынындағы температура һәм башҡалар хаҡында ситтән, мәҫәлән, өйҙә килеш хәбәрҙар булырға ярҙам итә.

– Былтыр ошо ҡорамалды һатып алған танышым әле генә яныма килеп: “Телефоныма һаҡлағыстағы температура 10 градусҡаса күтәрелеүе хаҡында смс-хәбәр килде. Елләтеү торбаларын асырға ҡуштым”, – тип һөйләп торҙо. Бөгөн заманса технологиялар һәм уңайлыҡтар беҙҙең тармаҡҡа ла ҙур үҙгәрештәр индерә, – тип бәйән итте Роман ҡорамал менән ҡыҙыҡһынған һөнәрҙәштәренә.

Умартасыларҙың төбәк съезы милли ризығыбыҙҙы тағы ла киңерәк танытыу, ҡортсолоҡ һәм солоҡсолоҡ кеүек матур кәсептәребеҙгә иғтибарҙы арттырыу, төбәк балсыларын берләштереү йәһәтенән эшлекле майҙансыҡ ролен үтәне. Шулай уҡ был сара 47-се “Апимондия” халыҡ-ара конгресына әҙерлек булып торҙо.

Автор: Гөлдәр ЯҠШЫҒОЛОВА
Фото: Автор фотоһы

Баҫып сығарырға