Ошо көндәрҙә Иҫке Муса ауылы мәҙәниәт йортонда ағинәйҙәр осрашыуы булды. Унда Иҫке Бәпес, Олокүл ҡатын-ҡыҙҙары, шулай уҡ Мең ырыуына ҡараған Йәнбәк ауылы вәкилдәре саҡырылғайны.

Сараны ойоштороусы — ауыл китапханасыһы Миләүшә Мөхәмәтйәрова ҡунаҡтарҙы тәбрикләп, йыйынды башлап ебәрҙе.
— 2017 йылдың авгусынан ауыл китапханаһы янында “Ағинәйҙәр” клубы эшләп килә. Уның ағзалары экологик өмә­ләрҙә ҡатнаша, ауыл шишмәһе тирәһен йыйыштыра, шифалы дарыу үләндәре йыйыу һәм ҡулланыу менән шөғөлләнә. Күбеһе мә­сеткә йөрөй, дини йолалары­быҙҙы тоторға ла өлгөрә. Оло йәштә булыуҙа­ры­на ҡарамаҫ­тан, улар рес­публиканың 100 йыллығына бағышланған “Сәс­кә ат, күп милләтле Башҡорт­остан — татыулыҡ һәм изгелек ере” тип аталған район мәҙә­ниәт фестиваль-марафонында ҡат­нашты, — тине ул.

Осрашыуҙа “Ағинәйҙәр” тө­бәк йәмәғәт ойошмаһы етәк­сеһе Гөлфиә Янбаеваның ҡат­нашыуы сараға мәртәбә өҫтә­не. Ул үҙенең сығышында бик күп район һәм ҡала ағинәйҙә­ренең әүҙемлеге һәм фиҙакәр­легенең һоҡландырыуы, кем­деңдер бойороғо менән түгел, ә күңел ҡушыуы буйынса милли рухтағы эштәр башҡарыу­ҙары тураһында һөйләне. Халҡыбыҙ йолаларын, милли кейемебеҙҙе, кәсепселекте тер­геҙеү, экологик өмәләр, тәрбиә­үи эш ағинәйҙәрҙең көнитме­шендә төп урынды алып тора. Улар алдында ауыл халҡын йәмәғәт эштәренә йәлеп итеү бурысы ла ҡуйылған, ә күмәк шөғөл халыҡты берләштерә, битарафлыҡтан аралай, тигән ҡарашта Гөлфиә Гәрәй ҡыҙы. Ағинәйҙәргә ҡарап, ир-егет­тәре­беҙҙең дә әүҙемләшеүе шатландыра.

Ҡунаҡтар ауылда боронғо ҡомартҡыларҙың — ағас карауат, бишек, япма, сигеүле таҫтамалдар, аҫалы балаҫ һәм башҡа бик күп әйберҙәрҙең — быуындан быуынға күсә килеп, бөгөнгә тиклем һаҡланып ҡалыуына ҡыуанды.

Иҫке Муса ағинәйҙәре та­машасыларға халыҡ йолаларынан “Кис ултырыу” күре­не­шен тәҡдим итте. “Кис ултыр­ған”да улар балалар өсөн үҙҙәренең изге теләктәрен көйләп ишеттерҙе, йөкмәткеле шиғырҙар ҙа уҡылды.

Яулыҡ ябыныу ҡатын-ҡыҙҙы биҙәп кенә ҡалмай, тәрбиәүи алым да булып тора. Роза Сәлихованың яулыҡ ябыныу буйынса йәштәргә оҫталыҡ дәресе үткәреүе сараға мәртә­бә өҫтәне.

Артабан ҡунаҡтар сығыш яһаны. Бигерәк тә Ғәлиә Абдуллина етәкселегендәге Иҫке Бәпес ауылы ағинәйҙәренең маһирлығы һоҡландырҙы. Китапханасы Фәүриә Әбүтали­пова үҙе ижад иткән йырҙарын бүләк итте (әйткәндәй, уҙған йылда беҙ уларҙың эше менән танышып, тәжрибә уртаҡла­шып ҡайтҡайныҡ). Унан һуң район ағинәйҙәр ойошмаһы етәксеһе, Олокүл ауылынан Флүрә Самиҡова Аҡмулла шиғырына яҙылған мөнәжәт көйләп ишеттерҙе. Йәнбәктәр ҙә буш ҡул менән килмәгән — улар клубҡа иҫтәлекле бүләк тапшырҙы.

Осрашыу сәй табынында дауам итте. Ағинәйҙәрҙең төп теләге — үҙ-ара аралашыу, дуҫлыҡты нығытыу, әлеге башланғысты һүндермәй да­уам итеү. Был һуңғы сара булмаҫ, матур йолаға әйләнер, тип ҡәнәғәт булып тара­лыштыҡ.