“Рәсәйҙең патриоты һәм лайыҡлы гражданы булырға ант бирәм…”

Октябрьский ҡалаһының балалар-үҫмерҙәр ижады һарайы директоры Вера Ульянова “Йәш армия” хәрәкәтендә әүҙем ҡатнашыусылар менән беҙҙе бик теләп таныштырҙы. Килешеп торған армиясылар формаһы, ҡыҙыл берет кейгән ыҫпай, етди ҡарашлы үҫмерҙәр араһында ҡыҙҙарҙың күп булыуы хайран итте.

Өҫтәлдә хәрби экипировка, граната, ҡоралдарҙың уҡыу макет­тары. Һәр “һалдат” уларҙың тө­ҙөлөшөн өйрәнә, ҡулланыу сер­ҙәрен үҙләштерә. “Ҡорал ме­нән эш итеү уйын түгел. Бында ла юғары мәҙәнилек, йый­наҡ­лыҡ, теүәллек кәрәк”, – ти ҡыҙҙар.

– Мин киләсәктә мотлаҡ офицер буласаҡмын, шуға күрә хәрби техниканы энәһенән-ебенә саҡлы өйрәнеү өсөн йәш боец курсын үтергә теләйем, – ти Кирилл Мамонов. – “Йәш армиясы”ларҙың тан­та­налы, оло яуаплылыҡ йөк­мә­теүсе, йөрәккә үтеп инерлек ан­тын яттан беләм һәм уға торошло булыу өсөн тыры­шасаҡмын.

Патриотик тәрбиә үҙәгендә өс взвод ойошторолған. Һигеҙ йәш­тән бында шөғөлләнә башларға мөмкин. Балалар тигеҙ рәт менән сафта йөрөргә, яралыларға беренсе ярҙам күрһәтергә, ҡул көрәше нигеҙҙәрен үҙләштерергә өйрәнә.

– Ә миңә иң оҡшағаны – парашюттан һикереү! Ул саҡтағы бәхет тойғоһон бер ниндәй башҡа хис-тойғо менән дә сағыштырып булмай. Рәхәтлек, иркенлек, ҡур­ҡыу тойғоһон еңеүҙән әйтеп бө­төр­гөһөҙ ләззәт табаһың. Ә парашютты йыйыу – үҙе бер ма­уыҡ­тырғыс, баш ҡатырғыс мәсьә­лә, сисә алһаң, үҙеңдә көс, ышаныс уяныуын тояһың. Нисек тә булһа, малайҙарҙан ҡалыш­маҫҡа, командаларҙы теүәл үтәргә тырышаһың, – ти Виктория Мамыкина.

2-се взводта 32 ҡыҙ йәш армиясы курсын үтә. Үҙәк­тә бар­лығы 106 бала даими шөғөл­ләнә.

Штаб начальнигы, Санкт-Пе­тер­бургтың махсус тәғәйен­лә­нештәге 118-се айырым уҡыу үҙә­генең инструкторы Александр Пшеничный әйтеүенсә, хәрби-пат­риотик хәрәкәттең төп маҡ­саты – балаларҙың геогра­фия­ға, ил тарихына һәм унда йәшәүсе төрлө милләт халыҡтарына, бө­йөк ғалимдарыбыҙға һәм полко­водецтарыбыҙға ҡарата ҡыҙыҡ­һы­ныу уятыу. Уҡыуҙан буш ва­ҡыт­тарында үҫмерҙәр мемориал, обелиск һәм башҡа иҫтәлекле урындарҙы һаҡлау, ирекмәндәр эшмәкәрлеге менән шөғөл­ләнәсәк, мәҙәниәт һәм спорт сараларында ҡатнашасаҡ, тәүге ярҙам күрһәтеү буйынса күнекмә аласаҡ.

Иҫегеҙгә төшөрәбеҙ: “Йәш армия” хәрәкәте Рәсәй Оборона министрлығы башланғысы менән ойошторолоп, ил Президенты тарафынан хупланды. Ә ДОСААФ ойошмалары хәрәкәттә ҡатна­шыусы “ҡыҙыл берет”тарға үҙ биналарында уҡыу өсөн ҙур мөм­кин­лек бирә.

“Йәш армия” ағзалары үҙҙә­ренә бүләк ителгән килешле хәр­би формаларҙы бик яратып кейә. Ҡышҡы ялан формалары ла бар икән. Йәй етһә, Ҡандракүл база­һын­дағы йәйге лагерҙа хәрби әҙерлек үтәсәктәр, патриотик йырҙар өйрәнеп, конкурста ҡатнашасаҡтар.

– Өҫтәмә белем биреү күнек­мәләрендә үҙҙәрен яҡшы яҡтан күрһәткән ҡыҙ һәм егеттәребеҙгә хәрби училищеларға, институт­тарға юл асыла. Бына шундай ныҡыш, егәрле ҡыҙҙарыбыҙҙың береһен IX кластан Федераль хәүефһеҙлек институтына уҡырға алдылар, – тип шатлығы менән уртаҡлаша Александр Федорович.