Яратҡан ағайым Фәрит Сабирйән улы Кирәевтең арабыҙҙан китеүенә ярты йылдан ашыу ваҡыт үтеп тә китте, әммә йөрәк түрендә уның тураһында яҡты иҫтәлектәр һаҡлана, улар күңелгә йылылыҡ һәм нур биргәндәй.

Фәрит Сабирйән улы Шишмә районында тыуып үҫә, бик иртә әсә на­ҙынан мәхрүм ҡала. Иҫ киткес матур йырлаған, өҙә баҫып бейегән егет бер ҡыйынлыҡһыҙ Өфө сәнғәт учи­лищеһының вокал бүлегенә уҡырға инә. Әммә һалҡын алдырып, тауышын юғалта, шулай ҙа етәксе­лек уны уҡыуҙан ебәрмәй. Фәрит ағай яҙмышын бейеү менән бәй­ләргә ҡа­рар итә. Башҡорт дәүләт фи­лар­мо­нияһында эш башлай, Японияла уҙған йәштәр фестивалендә ҡатна­шып, уңышлы сығыш яһап ҡайта.

Филармонияла эшләгән сағында беҙгә – Әбйәлил районының Амангилде ауылына гастролгә килде. Ул ваҡытта клуб бик бәләкәй ине, шуға күрә концертты ауыл советы алдында күрһәтергә булдылар. “Әминә Сабирйән ҡыҙының (әсәйем – автор) ҡустыһы килгән”, – тигән хәбәр­ҙе ишетеп, эргә-тирәләге ауылдар­ҙан да халыҡ эркелеп килгәйне. Ағайым йырланы ла, бейене лә. Ул ваҡытта Өфөнән артистар бик һирәк килә торғайны, уларҙы халыҡ сәхнәгә ҡабат-ҡабат һорап сығарҙы.

Концерттан һуң оҙон күкрәкле ар­баға егелгән атта ағайым менән Ҡаҙмашҡа ҡайттыҡ. Арбала бер биҙрә ялан сәскәләре. Ай яҡтыһын­да улар шундай матур булып күренә!

Мәктәпте тамамлағас, Башҡорт дәүләт университетына уҡырға индем. Фәрит ағайым минең өсөн һәр ваҡыт яҡты маяҡ булып торҙо. Уның кеүек булырға, тырышып уҡырға тырыштым.

Бейеүсенең сәхнәләге ғүмере ҡыҫҡа. Фәрит ағайым да БДУ-ның тарих факультетын тамамлап, уҡытыу эшенә күсте, университетта ла, Башҡорт дәүләт педагогия инс­титутында ла һабаҡ бирҙе. БДУ-ның данлыҡлы “Ирәндек” ансамблен етәкләне, сәнғәткә булған оло һөйөүен, бейеү оҫталығын студенттарына йәлләмәй өләште.