Бөгөн республика етәксеһе Радий Хәбиров Алкин-2 ауылында урынлашҡан 12-се айырым гвардия инженер бригадаһында булды.

Былтыр уның шәхси составы Сүриә биләмәһендә махсус хәрби бурыстарҙы үтәүҙә һәм “Көнсығыш-2018” стратегик команда-штаб уҡыуҙары уҙғарыуҙа ҡатнашҡайны.

Радий Хәбиров хәрби часть командиры, полковник Сергей Порохняның рапортын ҡабул иткәс, бригада офицерҙарына, сержанттарына һәм рядовойҙарына ҡотлау һүҙҙәрен еткерҙе.

“Ирҙәр байрамын Ватандың ысын һаҡсылары менән ҡаршылауыма шатмын, – тине республика етәксеһе. – Сапер-инженерҙарҙың девизы – “Беҙһеҙ берәү ҙә”. Тимәк, Рәсәй Хәрби Көстәренең бер төрө лә үҙенең хәрби бурыстарын һеҙһеҙ үтәй алмай. Беҙҙең 12-се бригада – инженер подразделениелары араһында иң алдынғыларҙың береһе. Һеҙгә яҡшы хеҙмәт, ныҡлы һаулыҡ теләйем”.

Радий Хәбиров хәрби часҡа медиа-ҡорамал алыуға сертификат бүләк итте. Ул артабан бригаданың казармаларын ҡараны, һалдаттар һәм контракт буйынса хеҙмәт иткәндәрҙең ниндәй шарттарҙа йәшәүе менән ҡыҙыҡһынды. Бында төбәк етәксеһе ғибәҙәтхананы ла ҡараны, часть командирының дини кешеләр менән эшләү буйынса ярҙамсыһы, священник Рафаэль Королев менән һөйләште.

“Мохтажлыҡ бар икән, беҙ һалдаттарыбыҙға ярҙамға килергә һәр саҡ әҙербеҙ”, – тине диндар.

Радий Хәбиров шулай уҡ рядовойҙарға күпме түләнеүе менән ҡыҙыҡһынды. Командир әйтеүенсә, 2000 һум тирәһе. Һөйләшеүҙә хәрби часть өсөн ҙур булмаған спорт залы төҙөүҙә республиканың ярҙамына өмөт итеү тураһында ла әйтелде. Радий Фәрит улы белдереүенсә, был мәсьәлә буйынса округ командованиеһы менән фекер алышырға кәрәк буласаҡ.

Артабан республика етәксеһе санчасты ҡараны, инженер-сапер бригадаһы клубында саперҙарҙың заманса ҡорамалдары менән танышты. Ошонда уҡ Өфөнөң 16-сы мәктәбе уҡыусыһы, “Биктырыш” балалар клубы тәрбиәләнеүсеһе Айназ Ғәлина “Ҡояшлы ҡала” радиотапшырыуы өсөн Башҡортостан етәксеһенән ҙур булмаған интервью алды.

Радий Хәбиров йәш журналисҡа армияның батырлыҡ һәм тәртип мәктәбе булыуы, һәр ирҙең Тыуған ил алдындағы бурысын үтәргә тейешлеге хаҡында әйтте һәм, һис шикһеҙ, бәләкәй улы Фәритте хәрби хеҙмәткә әҙерләйәсәген белдерҙе.

Инженер бригадаһының төп плацында хәрби техника өлгөләре теҙелгән, шәхси состав улар ярҙамында үҙенең хәрби бурыстарын үтәй. Бында Радий Хәбиров сержанттар, рядовойҙар, контракт буйынса хеҙмәт иткәндәр менән аралашты. Уларҙың күбеһе – Башҡортостандан.

“Хеҙмәтебеҙ һәйбәт бара. Ғаиләләребеҙ яҡында йәшәй, ял көндәрендә ҡайтып йөрөйбөҙ, – тип һөйләне улар етәксегә. – Торлаҡ мәсьәләһен хәрби ипотека ярҙамында хәл итә башланыҡ”.

Радий Хәбировтың 12-се айырым гвардия инженер бригадаһына сәфәре хәрбиҙәр менән бергә сәй янында тамамланды.