Беҙ бөтәбеҙ ҙә минутына 15-20 тапҡыр күҙ йомғолайбыҙ. Күҙҙең һаҡланыу реакцияһын һиҙмәйбеҙ ҙә үҙебеҙ, сөнки уның тышҡы мөгөҙ ҡатлауы кәрәкле дымды алырға тейеш. Ә унда ҡан тамырҙары юҡ.

Әммә балағыҙҙың саманан тыш күҙен ҡыҫҡылауын һиҙеп ҡалһағыҙ, хәүефләнер­гә урын бар тигән һүҙ. Офтальмолог менән кәңәшләшеү мотлаҡ. Хәҙерге заман балаларының телевизор, компьютер алдында оҙаҡ ултырыуы, телефон менән мауығыуы нығынып етмәгән организм өсөн ҙур стресс булыуы мөмкин.

Телевизор экранына оҙаҡ текәлеп ултырыу күҙ мөгөҙ ҡатлауының ҡороуына сәбәпсе булыуы ихтимал. Иғтибар менән мультфильм ҡарағанда йә уйнағанда күҙ йомғолау йышлығы кәмей. Организм дымға ҡытлыҡты ҡаплау өсөн күҙҙәрҙе йыш йомғоларға мәжбүр итә. “Ҡоро күҙ синдромы” тигән терминды ишеткәнегеҙ барҙыр. Бала был осраҡта күҙҙәрен ыуғылап, ҡыҫҡылап ҡарарға ғәҙәтләнә. Күреү һәләте кәмегәнен сабыйҙың алыҫтағы предметҡа күҙҙәрен ҡыҫып текәлгәнендә асыҡ тоя алаһығыҙ.

Психологик проблемалар арҡаһында ла был хәлдең килеп тыуыуы мөмкин. Бит мускулдарының контролһеҙ ҡыҫҡарыуы күҙҙәрҙе йыш йомғолауға килтерә. Бындай осраҡта нервы тартышыуы күҙәтелә, баш ауыртыуы мөмкин. Кисекмәҫтән невропато­логка күренергә кәрәк.
Айырыуса мәктәп тормошона яраҡла­шыу осоронда, 6-7 йәштәрҙә, балалар ошо хәлдән яфалана.

Нервы тартышыуы (тик) күҙ ҡабағы мус­кулдарының ирекһеҙҙән ҡыҫҡарыуы, нервы көсөргәнешлеге һөҙөмтәһендә тыуыусан. Уны барлыҡҡа килтереүсе сәбәп­тәрҙең бер нисәһе: генетик бирешеүсән­лек, иммунитеттың кәмеүе, ҡайһы бер дарыу­ҙар тәьҫире, ҡанда калий, кальций һәм магний етешмәүе. Йыш ҡына кире эмоцияларҙың, ата-әсә тойомламаған борсолоу, ҡурҡыу тойғоһоноң да сәбәпсе булыуы мөмкин.