Хәҙерге заман әсәйҙәре подгузник, памперс тип йөрөтөлгән сабыйҙар өсөн бик кәрәкле гигиена әйберҙәренән башҡа бала үҫтереү мөмкинлеген белмәй. Ә бит бынан 20-30 йыл самаһы элек ҡатын-ҡыҙҙарҙың ошондай уңайлы әйберҙәр хаҡында ишеткәне лә булманы.

Бәлки, шуғалыр ҙа ҡайһы бер өләсәйҙәр уларҙың сабыйҙар сәләмәт­леге өсөн зарарлы булыуын раҫларға тырыша. Шул уйҙырмалар­ҙың бер нисәһен ҡарап үтәйек.

1. Подгузниктар эсендә “быу тәьҫире” барлыҡҡа килеү һөҙөмтә­һен­дә сабыйҙың тән температураһы күтәрелә, тән ағзалары ныҡ йылына. Малайҙар сәләмәтлеге өсөн был айырыуса зарарлы, хатта түлһеҙлек­кә килтереүе ихтимал.

Был фекер дөрөҫ түгел, тип иҫәпләй табиптар һәм эксперттар. Тикшеренеү­ҙәрҙән күренеүенсә, подгузниктың өҫкө яғы еүеш булғанда ғына, быуланырға мөмкин. Хәҙерге заманса памперстар­ҙың үҙенсәлеге шунда: уның бала тәненә тейеп торған эске ҡатламы, үҙе аша дымды үткәреп, оҙаҡ ваҡытҡа ҡоро ҡалыу үҙенсәлегенә эйә. Ваҡытында подгузникты алмаштырырға онотмағыҙ.

2. Памперстың ҡамасаулауы һөҙөмтә­һендә сабыйҙың быуындары дөрөҫ үҫешмәүе, ә аяҡтары кәкре үҫеүе ихтимал.

Эксперттар был фекерҙе лә кире ҡа­ға. Ысынында, памперстар сабыйҙың аяҡ­тары дөрөҫ үҫеүенә ярҙам ғына итә, хатта янбаш-бот быуыны дисплазияһы сирен иҫкәртеүгә булыша, тип иҫбатлай­ҙар.

Әммә өләсәйҙәрҙең түбәндәге фай­ҙа­лы кәңәштәрен һис тә инҡар итеп булмай.

Бала тәүлек әйләнәһенә памперста йөрөргә тейеш түгел. Көнөнә кәм тигәндә ике-өс тапҡыр унан арындырып, 20-30-ар минут ял ойоштороғоҙ. Һауа ванналары ла сабыйға файҙалы.

Әгәр ҙә памперсҡа аллергия билдә­ләре күҙәтелһә, уның маркаһын алыштырығыҙ.

Подгузниктарҙы йыш алмаштырып тороғоҙ. Баланың бер үк памперста өс сәғәттән дә ашыу булыуына юл ҡуймағыҙ.