Рәсәйҙең Дәүләт Думаһы депутаты Зариф Байғусҡаровтың матбуғат конференцияһына журналистар бик күп йыйылды – “Башинформ” агентлығының залы тулы ине. Һәр кем Рәсәй ҡануниәтенә ҡағылышлы үҙен ҡыҙыҡһындырған һорауҙарға яуап алып ҡалырға тырышты.

Депутатлыҡ эшмәкәрлеге осоронда Зариф Закир улы ил парламенты ҡара­уына 30 закон проекты индергән, шулар­ҙың ун етеһе рәсми баҫылып сыҡҡан, дүр­тәүһе беренсе уҡыуҙа ҡабул ител­гән, ҡалғандары ҡарарға әҙерләнгән.

Зариф Байғусҡаров ҡайһы бер ҡанун­дарҙың үҙенсәлектәрен дә аң­латты. Урманда сыбыҡ-сабыҡ йыйырға рөхсәт иткән ҡағиҙәне, мәҫәлән, урын­дарҙа яңылыш аңлағандар икән, шуға күрә полицияның ҡороған ағас тейәп ҡайтып килгән кешеләрҙе туҡтат­ҡан һәм штраф һалған осраҡтары ла булған.



Белеүебеҙсә, Рәсәйҙең Урман кодексына индерелгән ошо төҙәтмәнең авторы ла – Зариф Закир улы. Административ хоҡуҡ боҙоуҙар тураһындағы һәм Енәйәт кодекстарына ла ул индер­гән үҙгәрештәр бар: иҫерткес эсем­лектәрҙе законһыҙ һатыу менән шө­ғөлләнгән һәм алимент түләүҙән ҡасып йөрөгән өсөн яуаплылыҡ көсәйтелгән. Ауылдарҙа араҡы һәм көмөшкә менән сауҙа иткән оятһыҙ әҙәмдәр осраш­тырғылай. Был енәйәтсел ҡылыҡтары өсөн ундайҙар ошоға саҡлы ике мең һум штраф менән ҡотола ине, хәҙер был сумма 30 мең һумға еткерелде. Шул “эшмәкәрлек” өҫтөндә тағы то­толһа, бер йыл дауамында был кешегә ҡарата енәйәт эше ҡуҙғатыла. Депутат аңла­тыуынса, үҙгәрештең ыңғай йоғонтоһо бар: былтыр республикала алкоголде законһыҙ һатҡандарға 11 миллион һумлыҡ штраф һалынған, 66 кешегә ҡарата енәйәт эше ҡуҙғатылған, 32 кеше хөкөм ителгән.

Ул шулай уҡ Рәсәй парламенты ҡарауына тәҡдим иткән башҡа закон проекттары тураһында ла һөйләне. Зариф Закир улының әүҙем эшмәкәрлеге юғары баһалана – үткән йыл депутат Рәсәй парламентаризмын үҫтереүгә ҙур өлөш индергәне өсөн илебеҙ Хөкүмә­тенең Рәхмәт хатына лайыҡ булды.