“Афарин” программаһы ҡыҙыҡһыныу уятты.

Белорет ҡалаһының 21-се мәктәбендә яңы эшкә тотоноуҙан ҡурҡмаған уҡытыусылар эшләй. Уҡытыу рус телендә алып барыла. Төрлө милләт балаларының белем алыуы менән дә үҙенсәлекле был учреждение. Әйткәндәй, уларҙың күбеһе өйҙәрендә туған телендә аралаша, ә мәктәптә рус теленән башҡа инглиз, немец һәм башҡорт телдәрен өйрәнә.

Эйе, 21-се мәктәптең баш­ҡорт теле һәм әҙәбиәте уҡытыу­сылары ла заман менән бергә атлай. Уларҙың һәр береһе – 20-30 йыл ғүмерен балаларға белем биреүгә арнаған хөрмәт­ле һәм тәжрибәле педагогтар. Улар киләсәк быуынға башҡорт телен өйрәтеүгә, Башҡортостан Республикаһына, башҡорт халҡына һәм уның тарихына, мәҙәниәтенә хөрмәт һәм һөйөү тәрбиәләүгә күп көс һала.

Мәктәп уҡытыусылары бы­йылғы уҡыу йылынан башҡорт телен уҡытыуҙы, сит телдәрҙе уҡытыу методикаһына таянып, башҡасараҡ уҡытырға ҡарар иткән. Улар әҙерлек эштәрен был­тырҙан уҡ башлаған. Мәктәп етәкселеге ата-әсәләргә баш­ҡорт теле һәм әҙәбиәте уҡытыу­сылары әҙерләгән альтернатив уҡытыу программаһын тәҡдим иткән. Хәҙер ата-әсәләрҙең ғаризаһы нигеҙендә ҡайһы бер кластарҙағы бүтән милләт балалары яңы предметты өйрәнә башлаған.

Яңы программа “Афарин” тип атала. Уның буйынса балалар башҡорт телен аҙнаһына берәр сәғәт өйрәнә. Программа йылына һәр береһе бишәр сәғәттән торған ете модулде үҙ эсенә ала. Уҡыусыларға дәрестәрҙә тыуған яҡты өйрәнеү буйынса белем бирелә. Элеккеләренән айырмалы рәүештә, был программа, грамматикаға артыҡ туҡталмайынса, балаларҙы һөй­ләшергә өйрәтеү маҡсатын ҡуя.

Былтыр мәктәптә “Афарин” уҡыу-уҡытыу методик комплектын һынау һәм артабан ҡул­ланыу перспективалары” тигән тема буйынса тәжрибә майҙан­сығын асыуға арналған семинар булды. Сарала Белорет районы һәм ҡалаһы мәктәптәренең башҡорт теле һәм әҙәбиәте уҡытыусылары ҡатнашты. Эшлекле һөйләшеүгә килгән педагогтар алдында Яныбай Хамматов исемендәге башҡорт гимназияһы директоры Сулпан Уйылданова, 21-се мәктәптең башҡорт теле һәм әҙәбиәте уҡытыусылары Баныу Астанова, Сания Шәғәлиева телмәр тотто. Улар яңы программаның маҡ­сат­тары, бурыстары, перспективалары менән таныштырҙы. Инеш һүҙҙән һуң уҡытыусылар теорияны ғәмәлдә ҡулланыуҙы ҡарау өсөн асыҡ дәрестәргә таралышты. Гөлсибәр Шакирова III “в” класында – “Минең ярат­ҡан китаптарым”, Илсиә Нафи­ҡова IV “б” класында – “Башҡорт сувенирҙары”, Баныу Астанова V “г” класында “Өй йыһаздары” темаларына асыҡ дәрестәр күрһәтте.

Дәрестәрҙе ҡарағандан һуң семинарҙа ҡатнашыусылар “тү­ңәрәк өҫтәл” янында 21-се мәк­тәп уҡытыусылары тәҡдим иткән программаның көнүҙәк булыуы, башҡорт телен дәүләт теле бу­лараҡ өйрәнеү даирәһен киңәй­теүгә булышлыҡ итәсәге тура­һында ыңғай баһа бирҙе. Улар, тәжрибә майҙансығында эшлә­гән уҡытыусыларға уңыш­тар теләп, ыңғай тәьҫораттар алып, рәхмәттәр әйтеп таралышты.