Бөгөн – Рәсәй студенттары көнө.

Кәримә Әхтәмова Өфө дәүләт нефть техник университетында, иҡтисад һәм сервис институтының II курсында, белем ала. Ҡыҙ, тырышып уҡыуҙан тыш, йәмәғәт тормошонда әүҙем ҡатнаша, үҙен төрлө өлкәләрҙә уңышлы һынап ҡарай.

Кәримә Бәләбәй ҡалаһының башҡорт гимназия-интернатын алтын миҙалға тамамлай, мәк­тәп йылдарында ике тапҡыр ҡала хакимиәте башлығы сти­пендияһына лайыҡ була. Әү­ҙем ҡыҙ үҙен төрлө өлкәләрҙә эҙләй: һигеҙ йыл каратэ менән шөғөлләнә, бейеү серҙәренә төшөнә, вокал, фортепиано, һынлы сәнғәт мәктәбе, гитара, театр түңәрәктәренә йөрөй. Республика кимәлендәге бәйге­ләрҙә даими ҡатнаша, “Урал батыр” эпосын яттан һөйләй. “Йәш гвардия” ойошмаһының активисткаһы, ЮНЕСКО мәктә­бе клубының президенты булыуҙан тыш, Кәримәне фән өлкәһе лә ҡыҙыҡһындыра, “Баш­ҡорттар сит илдә: йола­ларға тоғролоҡ” исемле ғилми хеҙмәт яҙа.

– Белем алыуҙан тыш, хәл-ва­ҡиғаларҙың уртаһында ҡай­нарға яраттым, йәмғиәт өсөн мөһим проблемаларҙың сиселеш юлдары ҡыҙыҡһындырҙы. Башҡортостанға файҙалы ке­ше булыр өсөн күберәк белер­гә, өйрәнергә ынтылдым, килә­сәк тормошомдо ла сәйәси-йәмәғәт эшмәкәрлеге менән бәйләгем килә ине, – ти ҡыҙ гимназия йылдары хаҡында.

Кәримә 11-се класта уҡыған сағында төҙөгән “Ирекмәндәр өсөн инглиз теле” проектын юғары уҡыу йортона ингәс тә да­уам итә. Республикабыҙҙа уҙған халыҡ-ара сараларҙа ирекмән булараҡ ҡатнашырға теләп тә, инглиз телен белмә­гәндәр өсөн ҙур ярҙам булған проект юғары баһалана, унда ҡатнашыусылар, шул иҫәптән Кәримә үҙе лә 2017-2018 йылдарҙа Конфедерациялар кубогына һәм футбол буйынса донъя чемпионатына эләгә.

Әле Кәримә нефть университетында белем алыуҙан тыш, асылына хыянат итмәй, ул ҡала советының Йәштәр йә­мә­ғәтселек палатаһы ағзаһы.
– Ҡаланың депутаттар советы, граждандарҙың мәнфә­ғәтен күргән кеүек, беҙ ҙә, мәктәп уҡыусылары, студенттар менән эш итәбеҙ. Улар менән һөйлә­шәбеҙ, проекттарын бойомға ашырырға ярҙам итәбеҙ, – ти Кәримә.

Әүҙем ҡыҙ бер ойошма ме­нән генә сикләнеп ҡалмай, ул Гражданлыҡ һәм мәғрифәт­се­лек йәштәр союзында ла тора.

– Беҙ бында яңы быуын вәкил­дәре, йәғни өлкән класс уҡыу­сылары менән эшләйбеҙ, төрлө слеттар, саралар, квес­тар, уйын технологиялары яр­ҙамында аралашабыҙ, киләсәк­тең төҙөү­сеһе тап үҙебеҙ икәнен төшөн­дөрәбеҙ, – тине ул ойош­маның эшмә­кәрлеге хаҡында.

Алдағы көнөнә ҙур ышаныс менән баҡҡан, уҡыуҙа ла, йәмәғәт тормошонда ла күп­тәргә өлгө Кәримә Әхтәмовала ватансылыҡ тойғоһо ла көслө. “Тыуған илемде яратам, республика өсөн ҡулымдан кил­гәндең бөтәһен дә эшлә­йәсәкмен. Башҡортостанда көн­күреш кимәлен күтәреү, уны башҡа төбәктәргә өлгө итеп ҡуйыу – маҡсатым ошо”, – ти ул.