Сибай институты хаҡында киң мәғлүмәт сараларында даими яҡтыртылып тора, әммә йөҙ тапҡыр ишеткәнсе, бер тапҡыр барып күр, тигәндәй, шәхсән барып күрешеүгә ни етә?! Был уҡыу йорто – ысын мәғәнәһендә студенттарынан юғары кимәлдәге белгестәр әҙерләгән вуз, тигән фекер ҡалды матди-техник база, тәрбиәүи алымдар, яуланған үрҙәре менән танышҡас.

Институт директоры, педагогия фәндәре докторы, техник фәндәр кандидаты Азат Вәлиев, “Баш­ҡорт­ос­тан” гәзите хеҙмәт­кәрҙә­ренә вузда экскурсия ойош­тороп, дәрестәргә алып инде. Ди­рек­торҙың социаль мәсьә­ләләр буйынса урын­ба­ҫа­ры, педагогия фәндәре кандидаты Семен Чернов – баш­ҡортса һыу эскән кеүек ара­лаш­ҡан шәхес. Доцент, филология фәндәре кандидаты Гөлкәй Сәмерханова тамаша залында гәзит хеҙ­мәткәрҙәре менән осрашыу алып барҙы, уҡыу йор­тоноң матбуғат хеҙмәте етәксе­һе Рәүилә Хәсәнова иһә урын­дағы киң мәғлүмәт саралары менән дә күрешеү ойошторҙо.

Тамаша залында уҙған осрашыу бик йылы тойғо­лар ҡал­дырҙы. Вуз йәштәре бик әүҙем, заманса ҡараш­лы. Битараф түгеллектәре биргән һорауҙа­рынан, сы­ғыш­тарынан да күре­неп то­ра ине. Үҙ шиғырҙарын уҡы­ған студенттарҙың шиғри һәләте сәхнәнән үк ҡолаҡҡа салынды. “Ете ырыу”, “Сармат”, “Эдельвейс” бейеү ансамблдәре сығыштары сараға дәрт өҫтәне. Әле булһа уларҙың дарманы күңелде күтәреп торғандай. Бындай уҡыу йортонда тап беҙҙең халыҡ өсөн, илһам­лы Башҡортостан өсөн эш­ләйәсәк белгестәр тәрбиә­ләнеүендә, белем алыуында һис шик юҡ.