Ошо көндәрҙә Учалы балалары ҡыуаныслы ваҡиға кисерҙе. Ҡаланың Ижад һарайында “Кванториум” технопаркы асылды. Ул, моноҡалаларҙы комп­лекслы үҫтереү программаһына ярашлы, дәүләт һәм шәхси партнерлыҡ һөҙөмтәһендә булдырылды.

Балалар технопаркы өсөн республика бюджетынан – һи­геҙ, урындағы ҡаҙнанан 4,8 миллион һум аҡса бүленде, сы­ғым­дарҙың өс миллионын Учалы тау-байыҡтырыу комбинаты үҙ өҫтөнә алды. Ошо аҡсаға ро­боттар конструкторлау өсөн йыйылмалар, электро­моделдәр өсөн тупланмалар, һанлы про­граммаға идара иткән фрезер һәм лазер станоктары, 3Д-прин­терҙар, ноутбуктар, интерәүҙем таҡталар, виртуаль ысынбар­лыҡ йыйылмалары, телескоптар, планетарий ҡайтартыла.

Балалар технопаркында дө­йөм проекттар буйынса эш алып барыласаҡ. Уҡыусылар станоктарҙы үҙләштерәсәк, программалау, робот техникаһы, пилотһыҙ осоу аппараттары төҙөү оҫталығына төшөнәсәк. Дәрестәрҙә электрон схемалар, улар нигеҙендә ҡулайламалар төҙөргә, программалар яҙырға, компьютер селтәрен мөхәррир­ләргә өйрәнәсәктәр.

– Технопарк “квантум” тип аталған лабораторияларҙан тора – IT-квантум, робоквантум, космоквантум һәм Hi-Tech цехы. Уларҙың һәр ҡайһыһы бала­ларҙы ижади эшкә ылыҡты­рырға, сәнәғәт секторында кә­рәк­ле инженер һөнәрҙәре серҙәренә төшөнөргә ярҙам итәсәк. Кванториум быға тиклем эшләп килгән электро- һәм авиамоделләү, радиоспорт, компьютер грамоталылығы түңәрәктәре нигеҙендә асылды. Балаларға ул, һис шикһеҙ, оҡшаясаҡ, – ти ижад һарайы директоры Наил Ирмикимов.

Робоквантум лабораторияһы тураһында Учалы уҡыусылары күптән хыяллана. Улар бында Lego конструкторҙары нигеҙен­дә роботтар яһаясаҡ. “Робот техникаһы” берләшмәһе Ижад һарайында былтыр уҡ эшләй башлаған. Әйткәндәй, күптән түгел Учалыла уҙғарылған “Европа-Азия.
Офоҡтарҙы асып” төбәк-ара фәнни-ғәмәли конференцияла Рәсүл Ғәфүров һәм Данил Сәләхүтдиновтың эштәре 2-се дәрәжә диплом менән билдәләнә. Уҡыусылар, тау тоҡомон сығарғандан һуң, шахтала барлыҡҡа килгән бушлыҡты тултырыу өсөн ҡатнашма күләмен лазер сканеры ярҙамында билдәләгән роботлаштырылған платформа уйлап таба. Уларҙың идеяһы тау сәнәғәте белгестәрендә ҙур ҡыҙыҡһыныу уята.

“Кванториум” ғинуар айынан тулы көсөнә эшләй башлаясаҡ. Учалы уйлап табыусыларының яңы асыштары, яңы ҡаҙаныш­тары алда әле.