20 декабрҙә Өфөләге “Торатау” Конгресс-холы эргәһендә район дауаханаларының баш табиптарына һәм водителдәргә өр-яңы “Ашығыс ярҙам” автомобилдәре асҡыстары тапшырылды.

Дауаханалар өсөн В класлы автотранспорт, Рәсәй Хөкүмәте бойороғона ярашлы, федераль ҡаҙнанан бүленгән аҡсаға һа­тып алынған. Дөйөм алғанда, республикабыҙға 49 медицина ярҙамы машинаһы тапшыры­ласаҡ, әлегә иһә уларҙың 23-ө Башҡортостандың төрлө төбәк­тәренә йүнәлде. Автомобилдәр бөтә стандарттарҙы иҫәпкә алып эшләнгән, ГЛОНАСС сис­темаһы, кондиционер, йылыт­ҡыстар, тауышты көсәйтеү ҡулайламалары, үпкәне яһалма елләтеү ҡорамалдары, дефибриллятор, электрокардиограф, пациенттарҙы күсереү һәм ташыу һәм башҡа саралар менән йыһазландырылған.

Бүздәк районынан яңы автомобиль артынан килгән Фәнзәүи Шәйхуллин, 32 йыл­лыҡ водитель стажым бар, тиҫтә йылға яҡын “ашығыс ярҙам” хеҙмәтендә эшләйем, быға тиклем реанимобиль йөрөттөм, ти. Уның һүҙенә Айҙар Хаматов, Балтас үҙәк район да­уа­ха­наһының баш табибы ла ҡушыла: яңы автомобилде юҡҡа ғына Фәнзәүи ағайға ышанып тапшырмағандар. Берен­сенән, ул ошо йылдар эсендә бер ҡасан да юл-транспорт ваҡиғаһына тарымаған, икен­сенән, сирлеләрҙе дауаханаға тиклем бик һаҡ, ипле йөрөтә; тынғыһыҙ, әммә яуаплы эшен яратып башҡара, күптәргә өлгө булып тора икән.

...Өр-яңы 23 автомобиль республиканың төрлө төбәктә­ренә йүнәлде. Киләсәктә халыҡ­тың сәләмәтлеген һаҡлауҙа, кешеләргә ваҡытында ашығыс ярҙам күрһәтеүҙә уларҙың индерәсәк өлөшө баһалап бөткөһөҙ.