Подъездан башланған тәрбиә нимәгә илтә?

Киләһе йылдың ғинуарынан республикала подъездарҙы ремонтлау буйынса комплекслы программа тормошҡа ашырыла башлаясаҡ. Төп маҡсат – һәр кешенең иртәһе матурлыҡтан илһам алып башланырға тейеш. Исламда был йәһәттән ни әйтелә?

Динебеҙҙең нигеҙе – таҙалыҡ, матурлыҡ. Әҙәм балаһының күңеле пак, саф булырға, кейеме, йәшәгән урынының йыйнаҡлығы, күркәмлеге менән һоҡландырырға тейеш. Мәғлүм ки, пәйғәмбәребеҙ Мөхәммәт ғәләй­һис-сәләм гелән шуға саҡырған. Уның аҡ төҫтәге кейемгә өҫтөнлөк биргәне, һәр йәһәттән таҙалыҡҡа әйҙәгәне билдәле. Йыйыштырылған, төҙөк урында сәләмәтлек була, ә һаулыҡ – Исламда иң юғары төшөнсә. Ошонан сығып әйткәндә, күңел бөтөнлө­гөнөң нигеҙе – йәшәгән ереңдең, эргә-тирәңдең таҙалығында, матур­лы­ғында. Ғәмһеҙлек, ялҡаулыҡ сәбәпле ҡыйланған, емерелгән, бысратылған урында иһә төрлө ауырыу тамыр йәйә.

Пәйғәмбәребеҙ Мөхәммәт ғәләй­һис-сәләм үҙенең мөбәрәк хәҙисендә: “Әҙәм балаһының бәхете – йортоноң күркәм, яҡты булыуында”, – тигән. Ғаиләңде хәстәрләү, балаларҙы уңайлы шарттарҙа тәрбиәләү – Исламда бөйөк тәғлимәттәрҙең береһе. Йәшәгән урының матур, нурлы икән, өйҙә гелән тыныслыҡ була. Әҙәм балаһы бындай “ҡәлғә”лә күңеленә рәхәтлек табып, рух, дәрт, көс туплап йәшәй. Белеүебеҙсә, йорт тәҙрәләре­нең ҡояшҡа ҡаратып урынлаштырылыуы ла мө­һим. Яҡтылыҡ төшмәгән өйҙө төрлө сир һағалап тора, унда хатта гөл дә үҫмәй.

Йәшәгән урындың матурлығы, төҙөклөгө, уңайлы шарттар ғаиләнең ныҡлығына, балаларҙың тәрбиәлеле­генә нигеҙ һала. Йәш быуын бындай мөхиттә яҡтыға ынтылып, булғандың ҡәҙерен белергә, һаҡларға өйрәнеп, берҙәмлеккә таяныу мөһимлегенә инанып үҫә. Иншаллаһ, улар үҙҙәре лә балаларын шулай тәрбиәләйәсәк. Ә көн дә бысраҡ, ҡарауһыҙ подъез­дарҙы күреп үҫкәндәр киләсәктә ниндәй булыр?..

Кеше ҡайҙа ғына йәшәмәһен – шәх­си өйөндәме, күп ҡатлы йорттамы – үҙен хужаларса тойорға, тимәк, ошо урынды хәстәрләргә, ҡәҙерләргә те­йеш. Аллаһ Тәғәлә әҙәм балаһын Ер йөҙөн йәмләү өсөн ебәргән. Ә ма­турлыҡ тиҙ тарала. Мәҫәлән, кемдер ишегенең төбөнә гөл ултыртып ҡуйҙы икән, күршеһендәге малай бында сүп ташларға, диуарға ниҙер яҙырға ҡыймаясаҡ. Ошолай һәр тупһанан, подъездан, йорттан башланған матурлыҡ, тәрбиәлелек, күркәмлек тора-бара бар донъяны яҡтырта.

Таҙалыҡ, төҙөклөк – күңел бөтөн­лөгөнөң, имен тор­моштоң нигеҙе. Йортоң ниндәй – илең дә шундай. Пәйғәмбәребеҙ Мөхәммәт ғәләйһис-сәләмдең “Ватанды һөйөү – иман­дың бер өлөшө” тигән һүҙҙәренең хаҡлығын йәнә бер ҡат раҫлай был.