Һеҙгә Благовар районының “Таң” ауыл хужалығы кооперативы эшсәндәре хат яҙа. 2009 йылда беҙҙең йәмғиәт банкрот тип табылды. Арбитраж суд булғандан һуң колхозға конкурс идарасыһы итеп Рәмил Хәйбуллов тигән кешене ҡуйҙылар.
Ул колхозсыларҙы йыйып: “Минең беренсе бурыс — һеҙҙең колхозды инвесторға һатҡас та, хеҙмәт хаҡы буйынса бурыстарҙы түләү”,— тине. Был хәл 2009 йылдың йәйендә булды. Колхоз бөттө тип тик ултырманыҡ, һәр кем үҙ эшен башҡарҙы. 2009 йылдың авгусында колхозға Өфөнән Азат Вәлиев тигән кеше килеп: “Мин һеҙҙең директор булам”, — тип таныштырҙы. Был кешене нисек етәксе итеп ебәргәндәрҙер, уныһы билдәле түгел, әммә район хакимиәтендә хәбәрҙар булғандарҙыр бит.
Күршелә тәүҙә таралып бөткән “Сәрмәсән” совхозы бар ине. Хәҙер беҙҙе шунда ҡуштылар. Колхоз бөтөү сәбәпле, беҙгә колхоздан сығып, “Сәрмәсән”гә эшкә инеү өсөн ғариза яҙырға ҡуштылар, хеҙмәт кенәгәһен йыйып алдылар. Һуңынан күптәрҙең хеҙмәт кенәгәһен юғалттылар. Хәҙер кемдән һорарға ла белмәйбеҙ. Көҙ колхоз көсө менән сәскән уңышты йыйырға тотондоҡ. Яғыулыҡ-майлау материалдары һатып алыу өсөн көн дә һыйыр һуялар һәм 200–400 литр яғыулыҡ алалар. Колхозда һыйырҙар ул ваҡытта күп ине. Йыйған уңышты баҫыуҙан тура ғына оҙата барҙылар. Шулай итеп, уңыш йыйылып бөттө. Келәттәргә ашлыҡ бик аҙ ҡайтты. Киләһе йылға сәсеүгә лә етерлек булманы. Аҙаҡ А. Вәлиев һыйырҙарҙы һатырға тотондо. Вәлиев, хеҙмәт хаҡы түләйем тип, беҙҙе оҙаҡ ҡына алдап йөрөнө. Ноябрь аҙағында ул бөтөнләй юғалды. Шунан беҙгә конкурс идарасыһы Р. Хәйбуллов килә башланы. Ул, колхозды Вәлиевкә һатмайым, тине, һеҙҙең колхозды “Благоваррыба” ойошмаһы ала, тине. Беҙ, колхозсылар, эшләп йөрөйбөҙ, хеҙмәт хаҡы түләгән кеше юҡ. Колхоздан ҡалған техниканы ҡайҙалыр оҙаттылар. Декабрҙә Хәйбулловтың ҡушыуы буйынса 2010 йылға сәсеүгә тип келәткә һалынған орлоҡто ла тейәп оҙаттыҡ, имеш, бурыстарығыҙҙы түләйем, тине.
2010 йылдың ғинуар айынан беҙҙе “Благоваррыба” тигән ойошма үҙ ҡанаты аҫтына алды. Ә беҙ һаман Хәйбулловтан хеҙмәт хаҡы көтәбеҙ. 2010 йылдың март йәки апрель айында ул эш хаҡы килтерҙе, тик шуның яртыһынан да аҙын бирҙеләр. Бына шулай тағы алданылар.
Шунан һуң, йыйылышып, район прокуратураһына мөрәжәғәт иттек. Улар беҙгә мировой судьяға барырға ҡушты. Мировой судья иһә, прокуратураға барығыҙ, тип кире бороп сығарҙы. Беҙ тағы аптырашта ҡалдыҡ. Аҙаҡ Өфөгә Арбитраж судҡа ғариза бирергә барҙыҡ. Ғаризаны алып ҡалдылар, бер айҙан һуң судҡа саҡырҙылар. Беҙҙе судья Р.А. Гаврикова ҡабул итте. Компьютерға баҫҡылап ултырҙы ла, һеҙ ниңә бында килдегеҙ, һеҙҙең управляющий Хәйбулловтың вәкәләте күптән ғәмәлдән сыҡҡан, йөрөмәгеҙ һоранып, тине. Уға, закон юҡмы ни, тигәс, “юҡ”, тип яуап ҡайтарҙы. Судья беҙҙән, күпме аҡса аласағығыҙ бар, тип һораны, 35 мең һум, тигәйнек, был аҡсамы ни, тип көлдө. Колхозсылар өсөн бер һум да аҡса, йылдар буйы хеҙмәт хаҡы алмаған кешегә ул хатта байлыҡ кеүек күренә. Беҙ барлығы 75 кеше. Аласаҡ аҡсаның суммаһы 900 мең һумдан ашыу.
2010 йылдың ноябрендә район гәзитенә хат яҙғайныҡ. Баҫтырып сығарманылар, декабрҙә редакцияға шылтыратып һораныҡ. Мөхәррир, хатығыҙ буйынса эшләйбеҙ, тип яуап бирҙе. 16 декабрҙә беҙҙең хатҡа яуап килде. Унда, был мәсьәлә контролдән алынмаған, саралар күрелә, тиелгәйне. Әммә бер йыл үтте лә инде, бер сара ла күрелмәй. Беҙҙәге тәртипһеҙлекте бер китапҡа яҙһаң да, һыйҙырып бөтөп булмаҫ. Ә был эш район етәкселәренә таныш. Һеҙҙән ҙур ярҙам көтөп ҡалабыҙ.