Район үҫешенә тос өлөш индергән ойошмалар бихисап. Ҡырмыҫҡалы районының иҡтисадын һәм социаль үҫешен “Кармаскалинсксельхоз­энерго” яуаплылығы сикләнгән йәмғиәтенән тыш күҙ алдына килтереү мөмкин түгел.

– Беренсенән, үҙем һайлаған һөнәр менән ғорурланам, үҫмер саҡта ваҡытында дөрөҫ йүнәлеш биргән туғандарыма рәхмәтем ҙур, – тип һөйләй ошо йәмғиәттең директоры, Башҡортостандың атҡаҙанған энергетигы Фәнис Мөхәмәтйәнов. – Икенсенән, тәүлектең һәр мәлендә бер нисә минутҡа ғына электр уты һүнгән тип күҙ алдына килтерәйек әле... Нимә булырын фараз итәһегеҙ­ме? Һүҙ ҙә юҡ, бик кәрәкле һөнәр.

Йәмғиәттә эшләргә теләүселәр бихисап, бында һәр йәһәттән дә тәртип булғас, айырыуса йәштәр күпләп ағыла. Бөгөн предприятиела 88 кеше иҫәпләнә. “Фәнис Ғилметдин улы, ҡыҙыҡ бит, коллектив тураһында һеҙ һис кенә лә 80 йәки 100 тип түңәрәкләп яуап бирмәнегеҙ, ә теүәл 88 тинегеҙ”, – тип тағы ла һорау бирҙем. “Иғтибар итһәгеҙ, баш осомда бөйөк Петр I фоторәсеме эленеп тора, власть ҡасан алмашыныуына ҡарамаҫтан. Юғиһә кемдәрҙер портреттарҙы алмаштырып өлгөртә алмай. Шуның ши­келле, һигеҙҙе горизонталь һалып ҡараһаң, был һан мәң­ге­лек тигәнде аңлата. Эйе, бөгөн кол­лектив ҙур түгел, әммә эш хаҡы ваҡытында түләнгәс һәм дәртләндереү саралары даими күрелгәс, һәр хеҙмәткәр урынын юғалтмаҫҡа тырыша, үҙ сиратын­да һуңғы һөҙөмтә етәкселекте ҡә­нәғәтләндерә. Ғөмүмән, мәң­ге­­лек төшөнсәләр күҙлегенән ҡарарға яратам”, – тине әңгәмәсем.

Йәмғиәт эшмәкәрлеген төрлө йүнәлештә йәйелдергән. 1993 йылдан электр энергияһын биреү һәм электр линияларын төҙөү буйынса хеҙмәттәр күрһәтеү– шуға асыҡ миҫал. Ә уға хәтлем, йәғни 1982 йылдан алып, район ауыл хужалығы предприятиела­рының электр ҡоролмаларын техник хеҙмәтләндереү һәм уларға электр ҡоролмалары үткәреү менән шөғөлләнгәндәр. Бөгөн йәмғиәт 750 километр оҙонлоғон­дағы электр линияларының бер туҡтауһыҙ ут биреүе өсөн яуаплы.

Предприятиеларҙың энергия һөҙөмтәлелеген күтәреү һәм энергияны һаҡлау программа­һына ярашлы, йыл һайын йорттарға 500-ҙән ашыу электр энергияһын иҫәпләү приборы урынлаштырыла. Үҙенә йөкмә­тел­гән төп бурыстарҙан тыш, йәмғиәт социаль мәсьәләләрҙе хәл итеү тәңгәлендә лә ҙур уй-ниәттәрҙе ғәмәлгә ашыра. Бын­дағы хеҙмәткәрҙәргә торлаҡ йорттар төҙөп биреү – шуның асыҡ миҫалы.

Предприятиела уңғандар бихисап. Фәнис Мөхәмәтйәнов бигерәк тә Зыя Гәрәевте, Альбина Ғиләжетдинованы, Айрат Әбсә­ләмовты, Илшат Юлдашбаевты, Рәмил Әҙиәтуллинды, Алик Мадъяровты, Фәнил Мөлөковты, Азамат Сирбаевты, Илдар Шәрифуллинды маҡтап телгә алды.