Балалар баҡсаһы 150 урынға иҫәпләнгән.


Башҡортостан Республикаһына 100 йыл тулыу уңайынан төрлө объекттар төҙөлә. Исемлектә белем биреү усаҡтары ла бар. Мәҫәлән, Бәләбәй ҡалаһында өр-яңы балалар баҡсаһы һалына.

– Йәй миҙгелендә тышта байтаҡ эште тамамланыҡ, хәҙер эскә күстек, – тип һөйләй “Главспецстрой” яуаплылығы сиклән­гән йәмғиәтенең участка начальнигы Артем Давыдов. – Тәҙрә урын­дарын уйып һәм уларҙы ҡуйып бөттөк, ишектәрҙе урын­лаштырҙыҡ. Беҙҙә һәр кем үҙ бурысына яуаплы ҡарағас, ҡы­тыршылыҡтарға һәм аңлашыл­маусанлыҡтарға юл ҡуйылмай. Хәйер, хеҙмәткәр үҙенә йөкмә­телгән заданиены тамамлауға сираттағыһын ала. Үҙ сиратында шуның нигеҙендә эш хаҡы түләнә. Стимул булдырғас, һәр береһе тырыша. Көн үтһә, шул еткән тиеүселәр арабыҙҙа юҡ.

Төҙөлөш тәңгәлендә йәмғиәт­тең тәжрибәһе ҙур. Быға хәтлем уңғандар Бөрйән районының Иҫке Собханғол, Тәтешле райо­нының Үрге Тәтешле ауылдарында, Ағиҙел, Октябрьский һәм Дәүләкән ҡалаларында ошоға оҡшаш балалар баҡсаһы ҡалҡытҡан. Бәләбәйҙән тыш бер үк ваҡытта Мәсетле районы үҙәге Оло Ыҡтамаҡта ла төҙөлөш йылдам алып барыла.

Артем Алексеевичтың һүҙ­ҙәренә ҡарағанда, объекттарҙы өлөшләтә төҙөү уларға хас түгел, нигеҙ ҡороуҙан алып асҡысты хужаһының ҡулына тапшырыу – отошло эш алымы.


Төҙөлөш ҡаланың Горохов урамында спорт-һауыҡтырыу комплексы янында бара. Май­ҙаны – 1 740 квадрат метр, бер ҡыйыҡ аҫтында ашхана, медпункт, спорт һәм тамаша залдары, алты төркөм өсөн бүлмәләр буласаҡ. Балалар баҡсаһы бөтәһе 150 урынға иҫәпләнгән.
Белем биреү усағы киләһе йыл көҙ кескәйҙәрҙе ҡабул итәсәк, тип ышандырҙы әңгәмәсем.

Горохов урамында йәшәгән дүрт бала әсәһе Наташа Максимова һөйләүенсә, ул киләһе йылдан ҡыҙын һәм улын йорттары эргәһендә генә урынлаш­ҡан балалар баҡсаһына йөрөтә башла­ясаҡ. Юғиһә иртәнсәк ғәзиздәрен оҙатып ҡуйыуға күп ваҡыт китә. “Яҡын булыуы үҙе бәхет, етмәһә, ул заманса йыһазлан­дырыласаҡ, тинеләр”, – тип өҫтәне ул.

– Төҙөлөш тармағы һеҙҙең өсөн нимә? – тип һораныҡ Артем Давыдовтан.

– 16 йәштән төҙөлөш майҙан­сығындамын, үҙем теләп Өфө дәүләт нефть техник универ­ситетының төҙөлөш факультетына уҡырға индем, вузды уңышлы тамамланым. Һеҙҙең һорауға килгәндә, бөтә эште бөтөрөп, ситтән ҡарау – иң күңелле мәл. Ҡыҫҡаһы, шуның менән йәшәйем, – тине ул.