Кәсеп кенә түгел, ауыл иҡтисадын да үҫтерә был шөғөл.

Их, шәлдәре лә шәлдәре! Ниндәй генә семәрле, биҙәклеһе юҡ. Был матурлыҡты үҙ күҙҙәрегеҙ менән күрергә, йомшаҡ, йылы ғына шәл һатып алырға теләһәгеҙ, “ВДНХ-Экспо” күргәҙмәләр үҙәгенә ашығығыҙ. 28 ноябрҙә башланған “Өфө-Ладья. Арт. Кәсептәр. Сувенирҙар” экспозицияһы бөгөн дә эшләйәсәк.

Күргәҙмәлә, шәл бәйләүселәрҙән тыш, башҡа оҫта ҡулдар ҙа байтаҡ ине. Балаҫ һуғыусылар, ҡурай-ҡумыҙ, ағастан йәмле сувенир, ҡумта яһаусылар, кейем те­геүселәр – ниндәй генә кәсеп оҫталары юҡ бында! Күргәҙмә-фестивалдең маҡсаты ла – республиканың һәм илебеҙҙең милли халыҡ кәсептәрен тергеҙеү һәм үҫтереү. Тағы 2020 йылда Өфөлә уҙасаҡ VI Бөтә донъя фольк­лориадаһына әҙерлектең мөһим бер өлөшө лә.

Шулай ҙа күргәҙмәнең йәме – һис шик­һеҙ, дебет шәлдәр. Уларҙы бәйләүсе алтмыштан ашыу оҫтабикә республи­ка­быҙҙың Ейәнсура, Стәрлебаш, Хәй­бул­ла, Көйөргәҙе, Күгәрсен, Ғафури һәм башҡа райондарынан килгән. Шәлдәрҙән башҡа үтә күренмәле нәзәкәтле косынкалар, йылы жилеттар, шарфтар, йом­шаҡ бейәләй-ойоҡбаштар ҙа ҡуйылған.

Төрлө семәрле, биҙәкле шәлдәр ара­һында иғтибарҙы икенсерәк төрлө итеп эшләнгәндәре йәлеп итте. Баҡтиһәң, Хәйбулла районы оҫтабикәләре шәлде бәйләмәй, ә махсус станокта һуға икән.

– Беҙҙә “Вәзәм һуҡма шәлдәре” клубы эшләп килә. Үҙебеҙҙең махсус станок­тарыбыҙ бар, шәлде шунда һуғабыҙ. Улар йылылығы һәм үҙенсәлеклелеге менән башҡаларҙан айырылып тора, – ти Бәләкәй Арыҫланғол ауылынан Гөлназ Сурина.

Күгәрсендәр иһә традицион шәлдәр тәҡдим итте. Район хакимиәтенең мәҙә­ниәт бүлеге начальнигы Рәмзиә Хөснул­лина әйтеүенсә, күргәҙмәгә 40-тан ашыу шәл килтерелгән.

– Хәҙер ауылдарҙа эш, аҡса юҡ тип ултырыусылар һирәк. Ҡатын-ҡыҙҙар ҡул эштәре, айырып әйткәндә, шәл бәйләүҙе кәсепкә әйләндерҙе. Һәйбәт кенә килем ала­лар. Һәр ауылда бар ундайҙар. Клуб­тар­ҙа йыйылып ҡул эштәре менән шө­ғөл­ләнәләр. Ағинәйҙәр, урындағы ҡа­тын-ҡыҙҙар советы ағзалары йәш ҡыҙ­ҙарҙы йәлеп итә, оҫталыҡ серҙәренә өйрә­тә, – ти ул.